को-को बन्दैछन् संसदीय दलका नेता ?

काठमाडौं – राष्ट्रपति विद्यादेवी भण्डारीले नयाँ सरकार गठनका लागि एक साताको समयावधि तोक्दै आह्वान गरेपछि राजनीतिक दलहरु संसदीय दलका नेता छान्नमा व्यस्त भएका छन् ।

कतिपय दलहरुले संसदीय दलका नेता छानिसकेका छन् भने मुख्य सत्तारुढ दल नेपाली कांग्रेस, नेकपा एमालेलगायतका केही दलहरु भने संसदीय दलका नेता छान्ने प्रक्रियामा गएका छन् ।

प्रतिनिधिसभामा प्रतिनिधित्व गर्ने गर्ने दलहरुमध्ये संसदीय दलका लागि सबैभन्दा धेरै छलफल वा विवाद नेपाली कांग्रेसमा देखिएको छ ।

कांग्रेस सभापति शेरबहादुर देउवाले नछाड्ने घोषणा गरिसकेको अवस्थामा युवा नेता एवं महामन्त्री गगन थापाले पनि संसदीय दलका लागि प्रयास गरेका छन् । त्यस्तै शेखर कोइरालाले पनि आफूले संसदीय दलका लागि उम्मेदवारी दिने बताइरहे पनि कांग्रेस संसदीय दलमा सभापति देउवाकै पल्ला भारी देखिन्छ ।

कांग्रेस कार्यसम्पादन समितिको बैठकले सबै प्रदेशहरुमा पनि संसदीय दलको नेता चयन गर्नका लागि निर्देशन दिइसकेको अवस्थामा संघीय संसदका लागि भोली (मंगलबार) सम्म संसदीय दलका नेता चयन गर्ने जनाइएको छ ।

त्यस्तै उता गठबन्धनको प्रमुख घटक माओवादीले केन्द्रले अध्यक्ष पुष्पकमल दाहाल ‘प्रचण्ड’लाई संसदीय दलको नेतामा निश्चित गरिसकेको छ भने प्रतिनिधिसभामा बलियो उपस्थिति जनाएको राष्ट्रिय प्रजातन्त्र पार्टीले अध्यक्ष राजेन्द्र लिङ्देनलाई संसदीय दलको नेता चयन गर्ने निश्चित छ ।

त्यस्तै प्रमुख प्रतिपक्षी दल नेकपा एमालेले अध्यक्ष केपी शर्मा ओलीलाई संसदीय दल नेतामा चयन गर्ने निश्चित भइसकेको अवस्थामा थ्रेसहोल्ड पार गर्न नसकेको नेकपा एकीकृत समाजवादीले पार्टी अध्यक्ष माधव नेपाललाई संसदीय दलको नेता बनाउने निश्चित भएको छ ।

उता संसदमा प्रतिनिधित्व गरेका नयाँ दलहरु राष्ट्रिय स्वतन्त्र पार्टी र जनमत पार्टीले भने संसदीय दलका नेता चयन गरिसकेका छन्् । दुवै दलबाट पार्टी सभापतिहरु संसदीय दलमा चयन भएको जनाइएको छ । स्वतन्त्रबाट रवि लामिछाने र जनमतबाट डा. सिके राउत सर्वसम्मत् संसदीय दलका नेतामा चयन भइसकेका छन् ।

त्यस्तै जनता समाजवादी पार्टी नेपाल, लोकतान्त्रिक समाजवादी पार्टी नेपालबाट भने संसदीय दलका नेतामा को बन्ने भन्ने छलफल जारी नै रहेको छ । लोसपाबाट महन्थ ठाकुरको सम्भावना बढी रहेको छ भने जसपाबाट अशोक कुमार राइको सम्भावना बलियो रहेको छ ।

प्रतिनिधिसभामा ३ सिटमा जितेको नागरिक उन्मुक्ति पार्टीबाट पार्टी अध्यक्ष रञ्जीता श्रेष्ठ नै संसदीय दल नेता हुने निश्चित छ । त्यस्तै राष्ट्रिय जनमोर्चा र नेपाल मजदुर किसान पार्टीले प्रतिनिधिसभामा १/१ सिटमात्र जित हात पारेका छन् । ती पार्टीहरुमा क्रमशः चित्रबहादुर केसी र प्रेम सुवाल मात्र प्रतिनिधिसभामा विजयी भएको हुनाले पार्टीको तर्फबाट उनीहरुले नै संसदीय दल नेताको रुपमा प्रतिनिधिसभामा भाग लिने निश्चित भएको हो ।