कांग्रेसको प्राथमिकतामा गठबन्धनभन्दा एमसीसी बढी

काठमाडौं – अमेरिकी सहयोग परियोजना (एमसीसी)का विषयमा पाँच दलीय सत्ता गठबन्धनमा विभाजन देखिँदै गर्दा सरकारको नेतृत्वकर्ता दल नेपाली कांग्रेस भने गठबन्धन जोगाउनेभन्दा एमसीसी पास गर्ने नीतिमा अघि बढेको छ । सत्तामा बस्ने र सरकारकै निर्णयका विपक्षमा नेता कार्यकर्ता उतार्ने सत्ताधारी सहयात्री दलहरूको व्यवहारबाट आजित बनेको कांग्रेस गठबन्धन जोगाउनेभन्दा एमसीसीलाई जसरी पनि संसद्बाट पास गर्ने नीतिसहित अघि बढेको हो ।

सोही नीतिअनुसार मंगलबार प्रधानमन्त्रीसमेत रहेका कांग्रेस सभापति शेरबहादुर देउवाले प्रमुख प्रतिपक्षी दल नेकपा एमालेका अध्यक्ष केपी ओलीसहितका नेताहरूसँग भेटघाट गरेका हुन् । प्रधानमन्त्री देउवालाई भेट्न ओली आफ्ना पार्टीका नेताहरूसहित बालुवाटार पुगेका थिए ।

प्रधानमन्त्री देउवाले आन्तरिक रूपमासमेत एमसीसी पास गर्ने गृहकार्यका लागि नेताहरूलाई खटाएका छन् भने उनले बालुवाटारमा दैनिकजसो गठबन्धनमा आबद्ध दलका नेताहरूलाई छुट्टाछुट्टै संवादसमेत जारी राखेका छन् । सरकारले गत ८ फागुनमा प्रतिनिधिसभा बैठकमा एमसीसीसम्बन्धी प्रस्ताव टेबल गरिसकेको छ । तर, टेबल गर्ने विषयमा सहमति दिएका दल र ती दलका शीर्ष नेतृत्व नै अहिले एमसीसीको विपक्षमा मतदान गर्ने भन्दै सरकारी नीतिकै विरोधमा छन् ।

प्रधानमन्त्रीनिकट रहेका कांग्रेसका एक नेता भन्छन्, ‘सरकारमा पनि बस्ने, सरकारको नीतिविरुद्ध पनि लाग्ने र गठबन्धन पनि जोगाउने भन्ने हुँदैन, कांग्रेसले अब विकल्पसहित अघि बढ्ने नीति लिन्छ, त्यो अवस्था बन्दै छ ।’

कांग्रेस महामन्त्री गगन थापाले समेत मंगलबार चितवनमा आयोजित एक कार्यक्रममा एमसीसीको विपक्षमा मतदान गर्ने सत्तारूढ दलसँग सहकार्य आवश्यक नरहेको बताएका थिए । प्रधानमन्त्री देउवालेसमेत पार्टीका नेताहरूसँगको आन्तरिक छलफलमा एमसीसी जसरी पनि पास गर्नुपर्ने भन्दै गठबन्धनभन्दा एमसीसीलाई प्राथमिकतामा राखिने ब्रिफिङ गर्दै आइरहेका छन् ।

सत्तारूढ गठबन्धनमा आबद्ध नेकपा माओवादी केन्द्रले एमसीसीका विपक्षमा उभिने निर्णय संसदीय दलको बैठकबाटै गरिसकेको छ । सो बैठकमार्फत उसले एमसीसी अघि बढाए सरकारबाटै बाहिरिने चेतावनीसमेत दिँदै आएको छ । अर्को सत्तारूढ दल नेकपा एकीकृत समाजवादीको सचिवालय बैठकले पनि एमसीसी सम्झौताको विपक्षमा उभिने निर्णय गरेको छ ।

सत्तारूढ दलमध्येकै अर्को दल जनता समाजवादी पार्टीभित्र डा. बाबुराम भट्टराई समर्थनमा भए पनि जसपाले औपचारिक निर्णय गरिसकेको छैन । जसपाका अध्यक्ष उपेन्द्र यादवलगायतका नेताहरू एमसीसीको विपक्षमा छन् । सत्ता गठबन्धनको अर्को घटक राष्ट्रिय जनमोर्चाले एमसीसी टेबल हुँदा नै संसद्बाट विपक्षमा उभिने घोषणा गरिसकेको छ ।