पेट्रोलियम पदार्थको मूल्य बढेपनि निगमलाई दुई अर्ब ५० करोड घाटा

काठमाडौं – पेट्रोलियम पदार्थको मूल्य बढेपनि नेपाल आयल निगमलाई थप दुई अर्ब ५० करोड घाटा हुने भएको छ । निगमले आगामी १५ दिनमा २ अर्ब ५० करोड ३२ लाख रुपैयाँ घाटा हुने प्रक्षेपण गरेको हो । चालू आर्थिक वर्षको फागुन महिनासम्म करिब २८ अर्ब रुपैयाँ नोक्सानी हुने अवस्था देखिएको निगमले जनाएको छ ।

निगमले पेट्रोलियम पदार्थको मूल्य फेरि बढाएपनि निगम घाटामै जाने देखिएको हो । नेपाल आयल निगमले विहीबार राति १२ बजेदेखि लागू हुनेगरी पेट्रोलियम पदार्थको मूल्य बढाएको छ । निगमले पेट्रोलमा प्रतिलिटर ५ रुपैयाँ तथा डिजेल र मट्टितेलमा पनि प्रतिलिटर ५÷५ रुपैयाँका दरले मूल्य बढाएको हो ।

योसँगै काठमाडौं उपत्यकामा पेट्रोलको मूल्य प्रतिलिटर १५० रुपैयाँ पुगेको छ, भने डिजेल र मट्टितेलको मूल्य १३३ रुपैयाँ पुगेको छ । यता हवाई इन्धन आन्तरिकतर्फ प्रतिलिटर १० रुपैयाँ बढाइएको छ । अन्तर्राष्ट्रियतर्फ हवाई इन्धनको मूल्य प्रतिकिलोलिटर १ सय डलर बढेको निगमले जनाएको छ ।

निगमका अनुसार खाना पकाउने एलपी ग्यासको मूल्य भने हाललाई यथावत् राखिएको छ । पेट्रोल तथा डिजेलको यो मूल्य अहिलेसम्मकै उच्च हो । भारतीय आयल कर्पोरेसन्सले पठाएको नयाँ मूल्यसूची अनुसार पेट्रोलियम पदार्थको मूल्य बढाइएको निगमको भनाई रहेको छ ।

रसिया युक्रेन तनावका कारण पेट्रोलियम पदार्थको मूल्य अन्तर्राष्ट्रिय बजारमा बढेकै कारण नेपालमा पनि त्यसको असर देखिएको हो । रुस–युक्रेन युद्धका कारण विश्व बजारमा पेट्रोलियम पदार्थको मूल्य आकासिएको छ । अन्तर्राष्ट्रिय बजारमा बिहिबार कच्चा तेलको मूल्य प्रतिव्यारेल १२० डलर पुगेको छ ।

अन्तर्राष्ट्रिय बजारमा कच्चा तेलको मूल्य आकाशिएसँगै निगमको घाटा पनि उत्कर्षतर्फ पुग्दै गएको हो । निगमले पेट्रोलियम पदार्थ खरिदबापत भारतीय आयल कर्पोरेशनलाई भुक्तानी गर्नुपर्ने रकम अपुग भएको भन्दै सरकारसँग सहयोग मागेको छ ।

यसैबीच, नेपाल आयल निगमले कर्मचारीलाई उपलब्ध गराउँदै आएको पोशाक संरक्षण खर्च कटौती गरेको छ । निगम सञ्चालक समितिको बैठकले घाटा न्यूनीकरणमा कर्मचारीका तर्फबाट योगदान गर्ने उद्देश्यले पोशाक संरक्षण भत्ता कटौती गरेको हो ।

सञ्चालक समितिको निर्णयसँगै निगमका स्थायी कर्मचारीले पोशाक संरक्षण भत्ता पाउने छैनन् । पोशाक संरक्षण खर्च कटौती भएपछि वार्षिक करिब ५० लाख रुपैयाँ खर्च न्यूनीकरण हुने निगमले जनाएको छ ।

यस्तै निगमले बिक्रेता कमिसन पनि हाललाई स्थगित गर्ने निर्णय गरेको छ । यसबाट पेट्रोलियम पदार्थको मूल्य बढेपनि बिक्रेताले कमिसन बापतको अतिरिक्त मूल्य पाउने छैनन् । यही फागुन ७ गतेको मूल्यमा आधारित कमिसन मात्र बिक्रेताले प्राप्त गर्ने निगमले जनाएको छ ।