गृहमन्त्री लेखकको स्पष्टिकरण : भिजिट भिसा प्रकरणमा मेरो कुनै संलग्नता छैन

काठमाडौं— गृहमन्त्री रमेश लेखकले आफू भिजिट भिसा प्रकरणमा कुनै पनि रूपमा संलग्न नरहेको दाबी गरेका छन्। शुक्रबार प्रतिनिधिसभाको बैठकमा बोल्दै उनले आफूलाई राजनीतिक प्रतिशोध स्वरूप फसाउने प्रयास भएको आरोपसमेत लगाए।

विपक्षी दल राष्ट्रिय स्वतन्त्र पार्टी (रास्वपा)को विरोधबीच संसद् बैठकमा मन्तव्य राख्दै लेखकले त्रिभुवन विमानस्थल अध्यागमन कार्यालयमा संलग्न कर्मचारीहरूमार्फत आफूलाई जोड्न खोजिएको बताए।

“केही कर्मचारी जोडिँदैमा मन्त्री दोषी हुन्छ भन्ने तर्क गलत हो,” लेखकले भने, “मेरो संलग्नता एक होइन, दुई होइन, तीन होइन — म प्रष्ट छु।”

उनले भ्रष्टाचार अनुसन्धानमा अख्तियार दुरुपयोग अनुसन्धान आयोगले गरिरहेको कामलाई पूर्ण सहयोग गर्ने प्रतिबद्धता जनाउँदै, आवश्यक परेमा स्वयं उपस्थित हुन तयार रहेको समेत बताए।

“मैले कुनै अनुसन्धानमा प्रभाव पार्नेछु भन्ने कुरा गलत हो,” लेखकले भने, “गृहमन्त्रीको जिम्मेवारी दुरुपयोग गरेको आरोप पनि निराधार छ।”

लेखकले आफूविरुद्ध नियोजित रूपमा नक्कली पीडित खडा गरेर जाहेरी दर्ता गराउने षड्यन्त्र भइरहेको पनि खुलासा गरे। उनले यस्ता कार्यमा संलग्नहरूलाई कानुनी कारबाहीको चेतावनी दिए।

“कतिपय पार्टी कार्यालयमा नक्कली पीडित बोलाएर जाहेरी लेखाउने तयारी भइरहेको मलाई जानकारी छ,” उनले भने, “किर्ते र जालसाजीमा संलग्नहरूलाई कारबाही गरिनेछ।”

उनले राजनीतिक पूर्वाग्रह राखेर व्यक्तिगत बदनाम गर्ने प्रयास नगर्न सबैलाई आग्रह गरे।