

सेनाभित्रको विकृतिः चरम हस्तक्षेप, डरलाग्दो रुपमा आर्थिक हिनामिना!

काठमाडौं – नेपाली सेनामा आफ्नो व्यक्तिगत स्वार्थको लागि जे जस्तो पनि कुकार्य गर्न र नेतृत्व सामू आफू चोखो रहेको देखाउन खोज्ने प्रवृति हावी छ। दिन प्रतिदिन केही सैनिक अधिकृतहरुको कारण सेनाको साख खस्किँदै गएको छ।
उपरथी रघु भण्डारी, उपरथी प्रेम शाही, उपरथी अनन्त कार्की, महासेनानी लक्ष्मण थापा सेनाभित्र विवादित अधिकृतहरु हुन्। उनीहरुले सेनाभित्र चरम हस्तक्षेप गर्दै आर्थिक हिनामिना गरेको सैनिक स्रोतको दावी छ।
स्रोतका अनुसार भण्डारी र शाही नेपाली सैनिक वीरेन्द्र अस्पतालमा कमान्डिङ अधिकृत भई काम गर्दा औषधी खरिद, विभिन्न सामानहरु खरिद र निर्माण कार्यमा चरम लापरबाही गरी ठूलो मात्रामा आर्थिक हिनामिना गरेका छन्।
उपरथीद्वयले जागिरको दौरानमा अकुत सम्पत्ति आर्जन गरेको पाएपछि सत्यतथ्य छानबिन गरी कारबाहीको माग गर्दै नेपाली सेनाका बहालवाला अधिकृत, पदिक तथा अन्य दर्जाका सैनिकहरुले प्रधानसेनापति प्रभुराम शर्मासमक्ष ६ पृष्ठ लामो प्रतिवेदन बुझाएका छन्।
पूर्व प्रधानसेनापति पूर्णचन्द्र थापालाई अरु अधिकृतहरुको कुरा लगाएर नजिक भएका उपरथी शाहीले आफू डिजिएमओमा बस्दा, भण्डारी सम्भाररथीको कार्यलयमा रहँदा, नीति महानिर्देशक रहँदा कार्कीले ठूलो रकम हिनामिना गरेको प्रतिवेदनमा खुलाइएको छ।
उपरथी शाही, कार्की, भण्डारी र महासेनानी थापाले कैलाली जिल्लाको बुढीतोला इलाकामा कालिज फर्म खोलेको प्रतिवेदनमा उल्लेख छ। आर्थिक हिनामिना गरेर कमाएको अकुत सम्पत्ति लुकाउनको लागि उनीहरुले कृषिमा लगानी गरेको स्रोतले बतायो।
झापामा कृषि फर्म खोलेका उनीहरुले बारा जिल्लामा समेत ठूलो परिणाममा जग्गा खरिद गरी बाख्रा पालन, माछा पालन गरेका छन्। सो जग्गाको व्यवस्थापन पूर्व प्र. से. राम बहादुर थापालाई जिम्मा दिएका छन्।
यसरी अवैध तरिकाले कमाएको सम्पतिलाई सेतो बनाउनको लागि उनीहरुले कषिमा लगानी गर्न थालेका हुन्। जन्ममिति ढाँटेर सेनामा जागिर खाएको विषय यसअघि पनि चर्चामा आएको थियो।
सो कुरा समेत प्रतिवेदनमा खुलाएर सेनापति शर्माको ध्यानकर्षण गराएका छन्। यसरी खुलेआम रुपमा आर्थिक हिनामिना गरेको विषयलाई सेनापति शर्माले कस्तो कदम चाल्लान्? त्यो हेर्न बाँकी छ।
उनीहरुले कुन–कुन ठाउँमा रहँदा आर्थिक हिनामिना गरे? सेनामा फेल भएको आफ्नो मान्छेलाई जागिर कसरी लगाए? लागूऔषध सेवनकर्तालाई छुटाएको विषय, सवारीसाधन खरिदको विषयमा भएको घोटाला, वर्तमान प्रधानसेनापति शर्मालाई ‘प्रधानसेनापति’ बन्न नदिनको लागि नेताहरु भेटेको विषय अझै बाँकी नै छ।
(नेपाली सेनाको विकृतिबारे हामी थप फलोअपमै छौं। अर्को श्रृंखला पढ्न हामीलाई फलो गर्नुहोला।)

