बैंक तथा वित्तीय संस्थामार्फत् शङ्कास्पद कारोबार बढ्दो क्रममा

काठमाडाैं-  नेपाल राष्ट्र बैंकले सार्वजनिक गरेको वित्तीय जानकारी इकाईसम्बन्धी वार्षिक प्रतिवेदनअनुसार, पछिल्लो पाँच वर्षमा बैंक तथा वित्तीय संस्थामार्फत् हुने शङ्कास्पद कारोबार उल्लेख्य रूपमा वृद्धि भएको छ।

गत आर्थिक वर्षमा बैंक तथा वित्तीय संस्थाहरूले ५,९३५ शङ्कास्पद कारोबार दर्ता गराएका थिए भने चालु आर्थिक वर्षमा यो सङ्ख्या ७,३३८ पुगेको छ।

सम्पत्ति शुद्धीकरण निवारण तथा आतङ्ककारी गतिविधिमा वित्तीय लगानी रोकथामका लागि नेपाल राष्ट्र बैंक अन्तर्गत सञ्चालनमा रहेको अनुसन्धानात्मक प्रणाली (गोएएमएल) मा आबद्ध अनुसन्धानकारी तथा नियामक निकायको सङ्ख्या १,६३९ पुगेको छ।

नेपाल राष्ट्र बैंकको विवरणअनुसार, यी अनुसन्धानकारी र नियामक निकायको सङ्ख्या निरन्तर बढ्दै गइरहेको छ।

सम्पत्ति शुद्धीकरण (मनी लाउण्डरिङ) निवारण ऐन, २०६४ अनुसार, संस्थाहरूले एकाइमा पेश गर्ने सीमा कारोबारको सङ्ख्या आर्थिक वर्ष २०७९/८० मा १६,९८,३९८ रहेकोमा आर्थिक वर्ष २०८०/८१ मा १६,९७,७१२ पुगेको छ।

गोएएमएल प्रणालीमा प्राप्त अधिकांश शङ्कास्पद कारोबार तथा गतिविधि प्रतिवेदन कर छली, मौद्रिक एवं बैंकिङ अनियमितता, विदेशी विनिमय, बीमा, सहकारीसम्बन्धी ठगी, चिठ्ठा, जुवा, सट्टेबाजी लगायतका आर्थिक अपराधसँग सम्बन्धित रहेको देखिएको छ।