एडीबीले तीन वर्षमा ६० करोड डलर सहुलियत ऋण दिने

काठमाडौं – एसियाली विकास बैंक (एडीबी) ले आगामी तीन वर्षमा ५० देखि ६० करोड अमेरिकी डलर सहुलियत ऋण प्रदान गर्ने भएको छ । नेपाल सरकारको दिगो र समावेशी आर्थिक विकासको सोचलाई कार्यान्वयन गर्न एडीबीले उक्त सहुलियत ऋण प्रदान गर्ने भएको हो । एडीबीका दक्षिण एसियाका लागि महानिर्देशक केनिची योकोयामाले चार दिने नेपालको भ्रमण क्रममा यस्तो बताएका हुन ।

भ्रमणको क्रममा योकोयामाले नेपाल सरकारको विकास एजेन्डालाई एडीबीको निरन्तर समर्थन गरेको बताए ।
काठमाडौँमा आएर यहाँका उच्च पदस्थ सरकारी अधिकारीहरूसँग एडीबी सहयोगका परियोजना, एडीबी र नेपालको साझेदारी तथा मूलभूत रणनीतिक मार्गदर्शनकाबारेमा छलफल गर्न पाउँदा मलाई अत्यन्तै खुसी लागेको छ ।

एडीबी महामारी प्रताडीत नेपाली अर्थतन्त्रको हरित, उत्थानशील र समावेशी पुनरुत्थानमा सहयोग बढाउन प्रतिवद्ध छ, जसले नेपालमा दिगो आर्थिक विकासका साथै नेपालीहरूको जनजीविकामा सुधार र जलवायु परिवर्तनजन्य प्रभावसँग सामना गर्न सक्ने उत्थानशीलता विकास गर्न सहयोग पुग्नेछ,’ योकोयामालाई उद्धृत गर्दै एडीबी नेपाल नियोगले भनेको छ ।

‘सार्वजनिक सेवा प्रवाहको जिम्मा स्थानीय तहमा हस्तान्तरण गरेसँगै अबको ध्यान संरचनागत सुधार तथा पूर्वाधार र मानव पुँजीमा गुणस्तरीय लगानी अभिवृद्धि गर्नेतर्फ केन्द्रित हुनुपर्छ, निजी लगानी तथा प्रत्यक्ष वैदेशिक लगानीलाई समेत प्रोत्साहीत गर्न यो आवश्यक छ । यसले कृषि, औद्योगिक उत्पादन र सेवाको उत्पादकत्व बढाउँछ– उच्च आर्थिक विकासका लागि यो अत्यावश्यक छ ।’

योकोयामाले एडीबी सहयोगमा निर्माणाधीन काठमाडौँ उपत्यका फोहोरपानी व्यवस्थापन परियोजनास्थलको अवलोकन गरेका थिए । १३.७ करोड अमेरिकी डलर लागतको यस परियोजनाले काठमाडौँ उपत्यकामा फोहोरपानी शुद्धीकरण सुविधाको विस्तार गर्नेछ । एडीबीका दक्षिण एसिया महानिर्देशक योकोयामाले अर्थमन्त्री जनार्दन शर्मासँगको भेटमा महामारीले जनस्वास्थ्य, कल्याणकारी कार्यहरू, अर्थतन्त्र, ८० प्रतिशत जनसंख्यामा पूर्णमात्रा खोप पुर्याउने कार्यको प्रशंशा गरेका थिए ।

उनले अर्थमन्त्रालयको नेतृत्वले विकासका कार्यक्रम र सुधारका काम समयमा, दक्षतापूर्वक र गुणस्तरीय ढंगले सम्पन्न हुने अपेक्षा रहेको बताएका थिए । अब स्थानीय तहमा सेवा हस्तान्तरण गर्दै वैदेशिक प्रत्यक्ष लगानीलगायत निजी क्षेत्रको लगानीलाई थप प्रोत्साहन गर्न पूर्वाधार र मानव पुँजीमा संरचनागत सुधार तथा गुणस्तरीय लगानीमा ध्यान केन्द्रित गर्न उनले नेपाललाई आग्रह गरे ।

आफ्नो ४ दिने भ्रमणका क्रममा योकोयामाले संस्कृति, पर्यटन तथा नागरिक उड्डयन मन्त्री प्रेमबहादुर आलेसँग पनि भेट गरेका थिए । यस्तै खानेपानी मन्त्री उमाकान्त चौधरी, सहरी विकास मन्त्री रामकुमारी झाँक्री ऊर्जा, जलस्रोत तथा सिँचाइ मन्त्री पम्फा भुसाल र भौतिक पूर्वाधार तथा यातायात मन्त्री रेणुकुमारी यादवलगायतका उच्च सरकारी अधिकारीसँग भेट गरेका थिए ।