लरेन्स विश्नोईको नाम लिएर फिरौती माग्ने नेपाली युवक पक्राउ

काठमाडौं– भारतीय ग्याङस्टार लरेन्स विश्नोई र अनमोल विश्नोईको नाम लिएर फिरौती मागेको आरोपमा एक नेपाली युवक पक्राउ परेका छन् । पक्राउ पर्नेमा सुर्खेतको भेरीगंगा नगरपालिका–७ का ४१ वर्षीय रामबहादुर बिसी (बुढा क्षेत्री) रहेका छन् ।  उनलाई बाँकेको कोहलपुरबाट प्रहरीले पक्राउ गरेको हो ।

कोहलपुरका डीएसपी धर्मराज भण्डारीका अनुसार, बिसीले विदेशी नम्बरबाट ह्वाट्सएपमार्फत पाँच करोड भारतीय रुपैयाँ (८ करोड नेपाली रुपैयाँ) फिरौती मागेका थिए । उनी यसअघि पनि विभिन्न आपराधिक घटनामा संलग्न रहिसकेको प्रहरीको क्रिमिनल रेकर्डमा देखिएको छ ।

क्षेत्रीविरुद्ध जीउ मास्ने बेच्ने, फिरौती असुली, धम्की दिएर चन्दा असुल्ने, हत्या, प्रहरीको हतियार खोस्ने जस्ता मुद्दा विभिन्न समयमा दर्ता भएका थिए । उनी माओवादी केन्द्रका नेता शक्तिबहादुर बस्नेतलाई गोली हान्ने घटनामा संलग्न भई ५ वर्ष कैद भुक्तान गरिसकेका व्यक्ति हुन् ।

उनले भारतीय आधारकार्ड समेत लिएको खुलेको छ । यसअघि पनि उनले अपराधी समूहमा आबद्ध भई विभिन्न गैरकानुनी कार्यहरू गर्दै आएको प्रहरीले जनाएको छ ।