लुटपाट र हिंसाबाट राजतन्त्र फर्किँदैन, दुर्गा प्रसाईं गुन्डा नाइके हो : मीनबहादुर

काठमाडौं- भाटभटेनी सुपरमार्केटका अध्यक्ष मीनबहादुर गुरुङले भाटभटेनी सुपरमार्केटमा लुटपाट र ढुङ्गा हानेर नेपालमा राजतन्त्र नफर्कने स्पष्ट पारेका छन् । आज भाटभटेनीले चैत १५ को घटनाका क्रममा कम्पनीको सुरक्षामा योगदान दिएका कर्मचारीहरूलाई सम्मान गर्ने कार्यक्रमपछि बोल्दै उनले राजसंस्था पुनर्स्थापना आन्दोलनका प्रमुख अगुवा दुर्गा प्रसाईँलाई ‘गुन्डा नाइके’को संज्ञा दिएका छन् ।

उनले भाटभटेनीमा भएको आक्रमणको आलोचना गर्दै राजसंस्था पुनर्स्थापनाका नाममा हिंसा गरेर कुनै लक्ष्य प्राप्त नहुने धारणा राखे । गुरुङले भने, ‘हामीले बर्सेनि सरकारलाई कर तिर्छौँ, त्यसैबाट सरकार सुरक्षाका लागि खर्च गर्छ । तर, हामीले सुरक्षा कहिल्यै पाएनौँ। हाम्रो व्यापार, कर्मचारी र ग्राहकहरूको सुरक्षाको ग्यारेन्टी खोइ ?’

उनले दुर्गा प्रसाईँलाई राज्यले संरक्षण दिएकाले नै अहिलेको स्थिति उत्पन्न भएको आरोप लगा ए। गुरुङले थपे, ‘राज्यले एकजनालाई पुलपुल्याउँदा यस्तो अवस्था आयो । उनले चाहे अनुसार राजसंस्था फर्कने होइन । मारवाडीहरूलाई दोष दिएर देश कङ्गाल बनाउन खोज्नेहरूसँग हामी असहमत छौँ। भाटभटेनी लुटेर, ढुङ्गा हानेर संविधान मेटिँदैन। यस्तो कार्य डकैतीबाहेक केही होइन ।’

चैत १५ गते राजावादी प्रदर्शनकारीहरूले राजधानीको तीनकुने र कोटेश्वर क्षेत्रमा हिंसात्मक प्रदर्शन गरेका थिए । प्रदर्शनको नेतृत्व गरेका दुर्गा प्रसाईँका समर्थकहरूले घर तथा व्यवसायिक संरचनामा तोडफोड गर्दै आगजनी गरेका थिए ।