यस्तो आयो पत्रकार सुरेश रजकको पोस्टमार्टम रिपोर्ट

काठमाडौं – गत चैत १५ गते काठमाडौंको तीनकुनेमा राजावादी प्रदर्शनका क्रममा आगजनीमा परेर मृत्यु भएका पत्रकार सुरेश रजकको पोस्टमार्टम पूरा भएको छ । त्रिवि शिक्षण अस्पतालको फोरेन्सिक विभागले रजकको जलेर मृत्यु भएको निष्कर्ष निकालेको छ।

फोरेन्सिक विशेषज्ञका अनुसार, रजकको शरीरमा गोली लागेको कुनै प्रमाण भेटिएको छैन । चिकित्सकले भने, “उहाँको श्वासप्रश्वास नलीमा धुँवाको मुस्लो देखिएको छ, जसले आगलागी हुँदा उहाँ जीवित नै हुनुहुन्थ्यो भन्ने पुष्टि गर्छ। मृत्युको कारण जलन नै हो ।”

यसअघि केही मिडिया र सामाजिक सञ्जालमा रजकलाई गोली लागेको दाबी गरिएका समाचारहरू आएका थिए । यही कारण चिकित्सकहरूले एक्स-रे बिना पोस्टमार्टम नगर्ने निर्णय गरेका थिए । एक्स-रे रिपोर्टले शरीरमा गोली नरहेको पुष्टि गरेपछि पोस्टमार्टम गरिएको हो ।

हाल रजकको शव परिवारलाई बुझाउने तयारी भइरहेको छ । परिवारले चाँडै अन्त्येष्टि गर्ने जनाएको छ ।