जेब्रा झोलाभित्र मृत भेटिएका दिपक सिग्देलः हत्यामा श्रीमतीकै संलग्नता!

काठमाडौं – यो साता सुनसरीको धरानमा जेब्रा झोलाभित्र टुक्रा–टुक्रा अवस्थामा भेटिएको शवले निकै ठूलो चर्चा पायो। अलग–अलग झोलामा टुक्रा पारिएको अस्थामा भेटिएको शवले अनुसन्धानमा समेत प्रहरीलाई हैरान बनायो।

गएको फागुन ४ गते र फागुन ५ गते अलग–अलग स्थानमा भेटिएको जेब्रा झोलाभित्र अन्दाजी ४०/४५ वर्षीय पुरुषको शव भेटिएको थियो।

तर, शव भेटिएको वरीपरि केही त्यस्तो ठेगाना खुल्ने कागजातहरू फेला नपरेपछि प्रहरीलाई शवको सनाखत गर्न निकै कठिन भयो। प्रहरी दिनरात नभनी शवको सनाखत गर्न लागिपर्यो।

अलग–अलग झोला र स्थानमा टुक्रा पारिएको अवस्थामा भेटिएको शवको सनाखत हुन नसक्दा जिल्ला प्रहरी कार्यालय। सुनसरीले मृतकको स्केच तस्बिर र हुलिया सार्वजनिक नै गर्नुप्रयो।

अन्ततः ६ दिनपछि उक्त शवको पहिचान खुलेको छ। निरन्तर अनुसन्धानमा लागेको सुनसरी प्रहरीले मृतकको शवको सनाखत गरेरै छाड्यो।

मृतक झापाको दमक नगरपालिका–५ का दिनेश सिग्देल भएको प्रहरी सनाखतबाट खुलेको छ। सुनसरी प्रहरी प्रमुख एसपी सञ्जयसिंह थापाका अनुसार सोमबार मृतकका परिवारका सदस्य आएर शवको पहिचान गरेका हुन्।

मृतक वैदेशिक रोजगारीको सिलसिलामा बहराइनमा रहेपनि जनवरी ४ मा नेपाल फर्केका थिए। उनको धरान बाहिर हत्या गरेर धरान–४ स्थित धरान–भेडेटार सडकखण्डको जंगलमा ल्याएर दुईवटा जेब्रा झोलाभित्र प्याक गरेर फालिएको थियो।

पारिवारिक कारणबाट हत्या
सुनसरी प्रहरीका अनुसार उनको मृत्यु पारिवारिक कारणबाट भएको हो। उनका दुई श्रीमती रहेको र दुवै श्रीमती अलग–अलग बस्ने गरेको खुलेको छ।

सुनसरी प्रहरीका अनुसार शवको सनाखतसँगै दुई जना पक्राउ परेका छन्। सिग्देलको हत्यामा संलग्न रहेको आशंकामा प्रहरीले दुई जनालाई गएराति विराटनगरबाट पक्राउ गरेको छ।

इलाका प्रहरी कार्यालय धरानका अनुसार गएराति सिग्देलको हत्यारा पक्राउ परिसकेका छन्। प्रहरीले शवको सनाखत भएसँगै हत्यारा पक्राउ परेको हुनाले पत्रकार सम्मेलनको तयारी गरिरहेको छ।

हत्यामा संलग्न रहेको आशंकामा मृतककै कान्छी श्रीमती र अर्को एक जनालाई प्रहरीले नियन्त्रणमा लिएको बताइएको छ। तर प्रहरीले थप अनुसन्धान गरिरहेकोले घटनाको बारेमा विस्तृतमा केही दिएको छैन्।

प्रहरीले घटनाको बारेमा विस्तृत जानकारी दिनका लागि पत्रकार सम्मेलन गर्ने तयारी गरिरहेको छ।

शव देखेपछि स्थानीयले प्रहरीलाई खबर गरेका थिए
गत बुधवार अर्थात फाुगन ४ गते धरान–भेडेटार सडक खण्डको जेठामाने गोलाई नजिक जंगलमा गोठाला र दाउरा खोज्न जानेले जेब्रा झोला देखेको र सो झोलाबाट दुर्गन्ध आएकाले शंका लागि खोलेर हेर्दा मान्छे देखेपछि प्रहरीलाई खबर गरेका थिए।

प्रहरीले झोला खोलेर हेर्दा मानिसको टाउको र दाहिने खुट्टा फेला परेको थियो। त्यसको भोलिपल्ट ५ गते बिहान प्रहरीले फेरी अर्को जेब्रा झोलामा बाँकी शरीर पहिले टाउको र खुट्टा भेटिएको स्थान भन्दा करिब १ किलो मिटरमाथि जंगलमा फेला पारेको थियो।

उक्त दुवै घटनास्थलमा फेला परेको मानव अंगहरु संकलन गरी एकीकृत गर्दा कालो छोटो कपाल अगाडी तालु भएको, छोटो दाह्री जुँगा, छातीमा जनै, घाँटीको भागमा मन्दिरमा पाइने माला लगाएको, एडिडास लेखिएको निलो रंगको ज्याकेट, खैरो रंगको जिन्स पाइन्ट, कालो बेल्ट, दुवै खुट्टामा स्पोर्टस् लेखिएको मोजा लगाएको, गहुगोरो वर्ण, क्षेत्रीरब्राहम्ण जातीको जस्तो देखिने, उचाई ५ फिट ५ इन्च भएको अनुमान गर्न सकिन्थ्यो।

भेटिएको शवको पहिचान हुन नसक्दा अनुसन्धानमा पनि निकै समस्या भएको थियो। घटनाको प्रकृति हेर्दा ‘प्रिप्लान मर्डर’ जस्तो देखिन्थ्यो। अन्त कतै पूर्वयोजना अनुसार हत्या गरिएको र शरीरको भाग छुट्टाएर फालिएको अवस्था प्रारम्भिक अनुसन्धानले देखाएको थियो।

शरीरका पूर्ण भाग फेला परे पनि शवको सनाखत हुन नसके पछि प्रहरीले ६ गते उनको स्केच पहिचानका लागि सार्वजनिक गरेको थियो।

यसरी घटनाको संघीय प्रहरी इकाई कार्यालय धरान, जिल्ला प्रहरी कार्यालय सुनसरी र इलाका प्रहरी कार्यालय धरानको संयुक्त टोलीले अनुसन्धान गरिरहेको थियो।