धरान जंगलमा टुक्रा पारिएको अवस्थामा भेटिएको शवको सनाखत

धरान – सुनसरीको धरान उपमहानगरपालिका–४ को जंगलमा टुक्रा टुक्रा अवस्थामा जेब्रा झोलाभित्र भेटिएको शवको पहिचान खुलेको छ ।

प्रहरीका अनुसार मृतक झापा दमक ५ का ४३ वर्षीय दिपक सिग्देल भएको खुल्न आएको छ ।

गत फागुन ४ गते धरान–धनकुटा सडकखण्डको जेठामाने गोलाइस्थित सामुदायिक वन क्षेत्रमा जेब्रा झोलाभित्र टुक्रा पारिएको अवस्थामा शव फेला परेको थियो।

उक्त झोलामा एक पुरूषको टाउको र दाहिने खुट्टा फेला परेको भने ५ गते सोही जंगलको उत्तर धरधरेमा अर्को झोलाभित्र बाँकी शरिर फेला परेको थियो ।

शरीरका पूर्ण भाग फेला परे पनि शवको सनाखत हुन नसके पछि प्रहरीले ६ गते उनको स्केच पहिचानका लागि सार्वजनिक गरेको थियो।

सुनसरी प्रहरी प्रमुख एसपी सञ्जयसिंह थापाका अनुसार मृतकका परिवारका सदस्य आएर शवको पहिचान गरेका हुन् । सोमबार आएका परिवारका सदस्यले मृतक दिपक सिग्देल भएको पुष्टि गरेका हुन्। मृतक वैदेशिक रोजगारीबाट फर्केका थिए । घटनाबारे अनुसन्धान भइरहेको प्रहरीले जनाएको छ ।

उक्त घटनामा संलग्न रहेको आशंकामा प्रहरीले २ जनालाई पक्राउ गरेको पनि जनाएको छ ।