धरानमा जेब्रा झोलामा शव भेटिएका व्यक्तिको अझै पहिचान खुलेन, प्रहरीले सार्वजनिक गर्यो तस्बिर

काठमाडौं – सुनसरीको धरान उपमहानगरपालिका–४ अवस्थित धरान–भेडेटार सडक खण्डमा पर्ने जंगलमा छुट्टाछुट्टै झोलाभित्र मानिसको टाउको, खुट्टा र शरीर भेटिएको शवको अझै पहिचान खुलेको छैन।

दुई स्थानमा झोलाभित्र प्याक गरेर फालिएको अन्दाजी ३५–४० वर्षको पुरुषको शव भेटिए पनि उनी को हुन् भन्ने पहिचान हुन नसकेपछि प्रहरीले नै ती पुरुषको अनुहार प्रस्ट देखिने तस्बिर सार्वजनिक गर्दै सनाखतको लागि सहयोग गर्न अपिल गरेको छ।

जिल्ला प्रहरी कार्यालय सुनसरीका अनुसार ती व्यक्तिको शव वीपी कोइराला स्वास्थ्य विज्ञान प्रतिष्ठानको शव गृहमा राखिएको छ। ४ फागुनमा ती व्यक्तिको छिनालिएको अवस्थामा टाउको र दायाँ खुट्टा मात्र फेला परेको हो भने त्यसको भोलिपल्टै छुट्टै स्थानबाट घाँटीभन्दा मुनीको शरीरको भाग र बाँया खुट्टा फेला परेको प्रहरीले जनाएको छ।

टाउको र दायाँ खुट्टाको भाग भेटिएको स्थानभन्दा करिब १ किलोमिटर माथि बाँकी शरीर र बाँया खुट्टा भेटिएको जिल्ला प्रहरी कार्यालय सुनसरीका प्रमुख एवं प्रहरी उपरीक्षक (एसपी) सञ्जयसिंह थापाले जानकारी दिए।

एसपी थापाका अनुसार बुधवार भेटिएको घाँटीभन्दा माथिको टाउकोको भाग र तिघ्रा मुनिको दाहिने खुट्टा थियो। बाँकी अंग खोज्न इलाका प्रहरी कार्यालय धरानका प्रहरी निरीक्षक (इन्स्पेक्टर) गजेन्द्र रायको कमान्डमा खटिएको टोलीले बिहीबार बिहान फेरी पनि अर्को जेब्रा झोलामा प्याक गरेको अवस्थामा बाँकी शरीरको भाग भेटेको हो।

उक्त दुवै घटनास्थलमा फेला परेको मानव अंगहरु संकलन गरी एकीकृत गर्दा कालो छोटो कपाल अगाडी तालु भएको, छोटो दाह्री जुँगा, छातीमा जनै, घाँटीको भागमा मन्दिरमा पाइने माला लगाएको, एडिडास लेखिएको निलो रंगको ज्याकेट, खैरो रंगको जिन्स पाइन्ट, कालो बेल्ट, दुवै खुट्टामा स्पोर्टस् लेखिएको मोजा लगाएको, गहुगोरो वर्ण, क्षेत्री/ब्राहम्ण जातीको जस्तो देखिने, उचाई ५ फिट ५ इन्च भएको प्रहरीले जनाएको छ।

बुधवारदेखि सनसनी मच्चिएको यो घटना निकै रहस्यमय भएको प्रहरी बताउँछ। अहिले सो घटनाको अनुसन्धानका लागि संघीय इकाई प्रहरी कार्यालय धरान, इलाका प्रहरी कार्यालय धरान र जिल्ला प्रहरी कार्यालय सुनसरीको टोली परिचालित छ।

भेटिएको शवको पहिचान हुन नसक्दा अनुसन्धानमा पनि निकै समस्या भएको प्रहरीको भनाइ छ। घटनाको प्रकृति हेर्दा ‘प्रिप्लान मर्डर’ हुनसक्ने एसपी थापा बताउँछन्। अन्त कतै पूर्वयोजना अनुसार हत्या गरिएको र शरीरको भाग छुट्टाएर फालिएको अवस्था प्रारम्भिक अनुसन्धानले देखाएको छ।

उनको हत्या के कस्तो हतियारले गरिएको हो भन्ने बारेमा फरेन्सिक जाँच पछि मात्रै खुल्ने एसपी थापाले बताए। एसपी थापाका अनुसार मृतकको पहिचानका लागि छिमेकी जिल्लाहरूमा समेत प्रहरीले पहलकदमी गरिरहेको छ।

मानिसको हत्या गरेर शरीरलाई टुक्रा–टुक्रा पारेर अलगअलग स्थानमा छर्नुले यो ‘प्रोफेसनल मर्डर’ हुनसक्ने बताइएको छ। मृतकको शवको तस्बिर पहिचानका लागि प्रहरीले सार्वजनिक समेत गरेको छ।