नारायणी अस्पतालमा १२ वर्षीय संक्रमित बालकको मृत्यु

वीरगञ्ज — कोरोना भाइरस संक्रमणबाट एक १२ वर्षीय बालकको मृत्यु भएको छ । वीरगञ्जस्थित नारायणी अस्पतालमा भर्ना भएका धोविनी गाउँपालिका–४ का १२ वर्षीय संक्रमित बालकको मंगलबार साँझ बजे मृत्यु भएको अस्पतालले जनाएको छ ।

माघ १६ गते स्वास प्रश्वासमा सहयोगका लागि ट्युब र ब्याग सहित नारायणी अस्पतालमा भर्ना भएका उनलाई भेन्टिलेटरमै राखिएको थियो । त्यसपछि उनको एक पटक पनि होस नआएको उपचारमा संलग्न चिकित्सकहरु बताउँछन् ।

उनलाई नेशनल मेडिकल कलेजबाट नारायणी अस्पतालमा रिफर गरिएको थियो । सोही दिन गरिएको एन्टिजेन परीक्षणमा पोजेटिभ आएका उनलाई निमोनिया पनि देखिएको अस्पतालले जनाएको छ ।

अस्पतालका कोभिड संयोजक डा. उदयनारायण सिंहका अनुसार शुरुमा उनलाई ज्वरो आएको थियो ।