बाफलमा भेटिएको शवको पहिचान, मृतक भनिएका व्यक्ति नै अभियुक्त!

काठमाडौं – काठमाडौँको बाफलमा जलेको अवस्थामा फेला परेको शवको पहिचान खुलेसँगै अभियुक्तसमेत पक्राउ परेका छन्। मृतक भनिएका व्यक्ति नै अभियुक्त रहेको प्रहरी अनुसन्धानबाट खुलेको छ।

मृतक काभ्रेका हर्कबहादुर बाँनिया भएको र हत्यामा संलग्न सुशील शर्मालाई पक्राउ गरेको महानगरीय प्रहरी वृत्त, कालीमाटीका प्रहरी नायब उपरीक्षक (डिएसपी) अनिल घिमिरेले जानकारी दिए।

१० दिनअघि जलेको अवस्थामा भेटिएको शवको सनाखत गरी अनुसन्धान सकेपछि मात्रै प्रहरीले मृतकको पहिचान खुलाएसँगै अभियुक्तलाई सार्वजनिक गरेको हो।

मृतक बानियाँले लगाएको चप्प्पल, टेक्ने छडी, लगाउने टोपी र कपडाबाट अनुसन्धानमा सहज भएको डिएसपी घिमिरे बताउँछन्। ‘अभियुक्तले दिएको बयान र हामीले भेट्टाएको प्रमाण मिल्न गएको देखियो,’ घिमिरेले भने।

०००
७ मंसिरमा बाफलस्थित माछापाटी चोकनजिकै स्थानीय अच्युतराज पाण्डेको घरमा जलेको अवस्थामा शव फेला परेको थियो। फेला परेको शवको सनाखत हुन प्रहरीलाई १० दिन लागेको हो।

शव फेला परेको खबर प्रहरीमा उक्तदिन साँझ १० बजे पुगेको थियो। प्रहरीलाई शव भेटिएको भन्दै खबर गर्ने व्यक्ति थिए, खेमराज अधिकारी भन्ने मानव। मानवले कालीमाटी वृत्तमा खबर गरेका थिए।

शव भेटिएको खबरलगत्तै कालीमाटी वृतका डिएसपी घिमिरेले घटनाको रेस्पोन्स लिए। लगत्तै शवको त्रिवि शिक्षण अस्पताल महराजगञ्जमा पोष्टमार्टमको लागि पठाइयो। अधिकारीले ‘भेटिएको शव मेरो साथी शुशील शर्माको हो’ भनेर प्रहरीसमक्ष खबर गरेका थिए।

लगत्तै अधिकारीलाई प्रहरीले नियन्त्रणमा लिएर थप सोधपुछ गर्न थाल्यो। भोलिपल्ट अधिकारीलाई लिएर डिएसपी घिमिरे घटनास्थल पुगे। घटनास्थलमा पुग्दा मृत भनिएका शुशील शर्मा त्यहिँ भेटिए। अनि प्रहरी आफैं चकित पर्यो।

मृत भनिएका व्यक्ति शुशील शर्मालाई पनि प्रहरीले नियन्त्रणमा लियो। शर्मा नै फेला परेपछि भेटिएको शवको सनाखत गर्न निकै जटिल हुने अवस्था आयो। अनुसन्धान सिधै शर्मातिर सोझियो।

त्यसपछि घटनाको अनुसन्धानमा महानगरीय प्रहरी अपराध महाशाखा, महानगरीय प्रहरी परिसर काठमाडौंको टोली र कालीमाटी वृत्त अनुसन्धानमा सक्रिय भयो।

अनुसन्धान गर्ने क्रममा प्रहरीको मुख्य टार्गेटमा रहेका शर्माबाट प्रहरीले कुरा फुत्काउन अनेक बहाना रच्न थाल्यो। ‘घटनाबारे सबै कुरा भनेको अवस्थामा तिमीलाई केही हुँदैन। सबै कुरा के–के हो राम्रोसँग भन भन्दै’ प्रहरीले फकायो।

त्यसपछि शर्माले साँचो साँचो कुरा भन्न थाले। ‘मृतक बानियाँ बाफल क्षेत्रमा माग्ने व्यक्ति हुन्। ३ मंसिरमा हामीहरुबीच भेट भएको हो। राति दुवैजनाले बसेर रक्सी खायौं, दुवैजनालाई रक्सी लागिसकेको थियो,’ शर्माले प्रहरीसमक्ष बयान दिएका छन्।

उनीहरुबीच रक्सीको नसामा उनीहरुबीच सामान्य झगडा भएको प्रहरी अनुसन्धानबाट खुलेको छ। ‘त्यसपछि सुरुमा टाउकोको पछिल्लो भागमा अभियुक्तले मृतकलाई हाने। जतिबेला मैले चुरोट सल्काइरहेको थिएँ। रिसको झोकमा त्यहि चुरोट र सलाई कोरेर अर्धबेहोस अवस्थामा ढलेका बानियाँले लगाएको कपडामा सल्काइदिएँ,’ अभियुक्तले स्वीकारेका छन्।

‘एक्कासी बानियाँको शरीरमा आगो सल्किएपछि अभयिुक्त शर्मा त्यहाँबाट भागेको देखिन्छ,’ महानगरीय प्रहरी परिसर काठमाडौंका प्रहरी प्रमुख प्रहरी बरिष्ठ उपरीक्षक (एसएसपी) अशोक सिंहले बताए।

‘सोही क्षेत्रमा अभियुक्त ३ दिन भाग्दै लुकेर बसे। जब शव फेला परेको समाचारहरु आयो। अनि अभियुक्त त्यसको भोलिपल्ट घटनास्थलमा आएको देखिन्छ,’ एसएसपी सिंहले भने।

अनुहारसमेत जलेकाले शवको सनाखत गराउनै निकै हैरान भएको यो घटनाको अनुसन्धान निकै जटिल र निष्कर्ष नाटकीय हुन पुगेको एसएसपी सिंह बताउाछन्।

बानियाँको हत्या गर्नुको कारण पैसा रहेको प्रहरीको प्रारम्भिक अनुसन्धानबाट खुलेको छ। घटनाको दिन दिउँसो मृतकको भेट मलेसियाबाट फर्किएको भतिजसँग भएको थियो। जुन दृश्य सुशीलले देखेका रहेछन्।

‘मृतक बानियाँको भतिजसँग भेट भएकाले टन्न पैसा दिएको हुनसक्ने भएकाले सुतेको वेला चोर्ने योजना बनाएको थिएँ। तर, रक्सीको नसामा पैसाको कुरा आएपछि झगडा भएको हो,’ अभियुक्त शर्माले भनेका छन्, ‘आवेगमा आएर त्यसपछि उनले ओढ्ने कपडामा आगो सल्काएर भागेको हुँ।’

मृतकका भतिजको सहयोगले शवको सनाखत गरी अभियुक्तलाई पक्राउ गर्न सफल भएको महानगरीय प्रहरी अपराध महाशाखाका प्रहरी प्रमुख एसएसपी चन्द्रकुबेर खापुङ बताउँछन्।

बानियाँ हत्याका अभियुक्त शर्मामाथि जिल्ला अदालत काठमाडौंबाट म्याद थप गरी अनुसनधान हुने प्रहरीले जनाएको छ।