अर्थतन्त्र निराशजनक अवस्थामा छैन्ः अर्थमन्त्री शर्मा

काठमाडाैं – अर्थमन्त्री जनार्दन शर्मा ‘प्रभाकर’ ले हल्ला गरे जस्तो अर्थतन्त्र निराशजनक अवस्थामा नरहेको बताएका छन् । कास्कीको लेखनाथ उद्योग वाणिज्य सङ्घले आयोजना गरेको लेखनाथ महोत्सवका उद्घाटन गर्दै अर्थमन्त्री शर्माले यस्तो बताएका हुन् । शर्माले हल्ला गरे जस्तो अर्थतन्त्र निराशजनक अवस्थामा नरहेको बताउँदै मूल्यवृद्धि वाञ्चित समेत सीमाभित्र रहेको बताए ।

‘गत आर्थिक वर्ष ०७७–७८ को पहिलो ६ महिनामा मूल्यवृद्धिको दर ३.५६% बिन्दुमा थियो । चालु आवको सुरुबाटै अन्तर्राष्ट्रिय बजारमा पेट्रोलियम, खाने तेल, प्लास्टिक, स्टील तथा स्टीलजन्य वस्तुलगायको निरन्तर मूल्यवृद्धि हुँदा नेपालमा असर देखिएको छ । यद्यपी, चालू आवको मध्यावधि समीक्षा गर्दा मूल्यवृद्धि दर ५.०३% मा रही बाञ्छित सीमाभित्रै रहेको छ’, उनले भने ।

यस्तै केही आयोजनाको काम सम्पन्न भए पनि भुक्तानी गर्न बाँकी रहेकाले पुँजीगत खर्च लक्ष्यअनुसार नदेखिएको उनको तर्क छ । फागुन २४ गतेसम्म १९.१५ प्रतिशत मात्रै पुँजीगत खर्च भएको भन्दै सबै विकासे मन्त्रालयलाई खर्च बढाउन दबाब दिएको जानकारी दिए । उनले खर्च बढ्न नसक्दा प्रधानमन्त्री शेरबहादुर देउवा र आफू चिन्तित बनेको बताए ।

शर्माले भने,‘फागुन २४ गतेसम्म १९ दशमलव १५ प्रतिशत मात्रै पुँजीगत खर्च भएको छ । प्रधानमन्त्री र म नै बसेर खर्च बढाउनु परो भनेका छौं । उनले अगाडि थपे ‘पुँजीगत खर्च लक्ष्यअनुसार हुन नसकेकोमा प्रधानमन्त्रीज्यू र म पनि चिन्तामा छौँ ।’

यस्तै उनले विकास खर्च लक्ष्यअनुसार हुन नसक्दा तरलतामा असर देखिएको बताए । उनले तरलता समाधान गर्न ३० अर्ब रुपैयाँ बजारमा आउनुपर्ने देखिन्छ । केही दिनअघि ११ अर्ब रुपैयाँ त आएको छ तर यो समस्या समाधान गर्नका लागि पर्याप्त छैन’ उनले भने ।

यस्तै घट्दो रेमिट्यान्सको समस्या समाधान गर्न हुण्डी कारोबारलाई नियमन गर्न थालेको तथा क्रिप्टोकरेन्सी, डिजिटल नेटवर्किङ, हाइपर फण्डलगायतका गैरकानुनी आर्थिक क्रियाकलाप रोक्न प्रधानमन्त्री शेरबहादुर देउवासँग छलफल गरी प्रहरी, राजस्व अनुसन्धान विभाग, सम्पत्ति शुद्धीकरण विभागलगायतको समन्वयमा क्रियाशील भएको बताए ।

चालु आर्थिक वर्षमा निर्यात व्यापारमा ठूलो सुधार ल्याएको शर्माको दाबी छ । ‘निर्यातमा निक्कै ठूलो सुधार भएको छ । विगतमा एक खर्बको निर्यात गर्न एक आर्थिक वर्ष कुर्नुपर्ने अवस्था थियो । अहिले त्यसलाई अन्त्य गरिएको छ’ उनले भने, ‘यसपालि ६ महिनामै निर्यातमा ९५ दशमलव ५ प्रतिशत सुधार भइ निर्यात एक खर्ब १८ अर्ब रुपैयाँ पुगेको छ ।

माघ मसान्तसम्म निर्यात झन् सुधार भइ एक खर्ब ३१ अर्ब रुपैयाँ पुगेको छ ।’ कुल वैदेशिक व्यापारमा निर्यातको हिस्सा गएको वर्ष माघ मसान्तसम्म ८ प्रतिशत रहेकोमा चालु आवको यही अवधिमा निर्यातको हिस्सा बढाएर १० दशमलव २९ प्रतिशत पुर्याइएको उनले जानकारी दिए ।