मोरङमा डरलाग्दो सामूहिक बलात्कारको घटना, अपहरणशैलीमा लगिएको थियो होटल!

काठमाडौं – मोरङको सुन्दरहरैँचा नगरपालिका–४ बलियामा सामूहिक बलात्कारमा परेकी महिलाको स्वास्थ्य अवस्था गम्भीर रहेको छ। गत शुक्रबार ती महिला सामूहिक बलात्कारको सिकार भएकी थिइन्।

३१ वर्षीया ती महिलाको कोशी अस्पताल विराटनगरमा उपचार भइरहेको छ। उपचारका क्रममा पनि उनी राम्रोसँग बोल्न सक्ने अवस्थामा छैनन्। बलात्कारका क्रममा उनको यौनाङ्ग क्षतविक्षत भएको उपचारमा संलग्न चिकित्सकहरुले बताएका छन्।

अमानवीय एवंम् क्रुर घटनाको सिकार बनेकी ती महिला बेला बेला कराउने र छट्पटाउने गर्छिन्। महिलाको अत्याधिक रक्तश्राव भएको छ। साथै शरीरभरि नीलडाम र चोटपटक छ।

अस्पतालकी प्रसूति तथा स्त्री रोग विशेषज्ञ डा. रिभा केसीका अनुसार बलात्कृत महिलाको अवस्था गम्भीर छ। तर उपचारमा कुनै कमी हुन दिइएको छैन। यौनाङ्गमा ठूलो असर पुगेकाले टाँका लगाउनुपर्ने अवस्था आएको केसीले बताइन्।

बहिनीको घर पुर्याइदिन्छु भन्दै होटलमा लगेपछि…
खोटाङको दिक्तेल घर भई मोरङको सुन्दर हरैँचाका गछियास्थित बहिनीको घरमा बस्दै आएकी थिइन् ती महिला। पारिवारिक आर्थिक अवस्था कमजोर भएकी महिलाले एक साताअघि मात्रै सुनसरीको इटहरीस्थित एउटा घरमा काम गर्न थालेकी थिइन्।

काम सकेर सुन्दरहरैँचाकै गछियास्थित बहिनीको घरमा फर्कदै गरेको अवस्थामा उनलाई शुक्रबार साँझ ६ बजेतिर तीनजना युवाहरुले भेट्छन्। लिफ्ट दिने भन्दै एउटा मारूती भ्यानमा रहेका ती युवाहरु महिलाको नजिक पुग्छन्।

इटहरीबाट गाडीमा गाडी चढेपछि उनले बहिनीको घरको लोकेसन दिन्छिन्। लिफ्ट दिने भन्दै चढाए पनि उनीहरुले ती महिलालाई सिधै बलियास्थित श्रेष्ठ होटल एन्ड फेमिली लजमा पुर्याउँछन्।

एकछिनमा बहिनीको घर पुर्याइदिने सर्तमा ती पुरुषहरुले उनलाई केही खाना खुवाउँछन्। खाना खाएपछि महिला बेहोस हुन्छिन्।  त्यसपछि होटलको एउटा कोठामा थुनेर महिलालाई तीन जनाले रातभर पालैपालो बलात्कार गर्छन्।

पटक पटकको बलात्कारको कारण पीडाले असह्य भएपछि उनी मध्यराति १२ बजेतिर चिच्याउँछिन्। त्यहिबेला बलात्कारमा संलग्न अर्जुन श्रेष्ठले महिलाको यौनाङ्गमा हात हालेर क्षतविक्षत बनाइदिन्छन्।

दुईजना पक्राउ, एकजना फरार
बलात्कारमा संलग्न तीन जनामध्ये दुईजना पक्राउ परेको प्रहरीले जनाएको छ। सुन्दरहरैचा नगरपालिका– ४ का ३६ वर्षीय अर्जुन श्रेष्ठ र उनका भाइ २५ वर्षीय सुरज श्रेष्ठ पक्राउ परेका हुन्।

यस्तै घटनामा संलग्न रामबहादुर नेपाली फरार रहेका छन्। उनको खोजी भइरहेको प्रहरीले जनाएको छ। प्रहरीले उनको नाम रामबहादुर नेपाली हो कि हैन भनेर यकिन हुन भने बाँकी रहेको जनाएको छ।

उनीसँगै बलात्कारमा संलग्न मनोज पनि फरार थिए। उनलाई भने प्रहरीले शनिबार साँझ पक्राउ गरेको हो। बलात्कार पीडित महिलालाई उपचारका लागि कोसी अस्पताल लिएर पुगेका होटल सञ्चालक अर्जुन शनिबार दिउँसो विराटनगरबाटै पक्राउ परेका हुन्।

उनले महिलालाई प्रदेश २–०१–००१ च २२७ नम्बरको गाडीमा राखेर उपचारका लागि कोसी अस्पताल लगेका थिए।

महिलालाई शुक्रबार साँझ गछिया पुलबाट त्यही गाडीमा राखेर रामबहादुरले होटलसम्म लगेको पाइएको प्रहरीले जनाएको छ।

बहिनीको घर पुर्याइदिन्छु भन्दै गाडीमा राखेर होटलमा लगेर सामूहिक रुपमा बलात्कार गरेको पाइएको मोरङका प्रहरी नायब उपरीक्षक (डिएसपी) एवं प्रवक्ता मञ्जील मुकारुङले जानकारी दिए।

बलात्कार गर्न नदिएर महिलाले प्रतिकार गरेपछि अर्जुनले हात भित्र छिएर महिलाको यौनाङ्ग नै क्षतिविक्षत बनाइदिएको प्रहरीको प्रारम्भिक अनुसन्धानबाट खुलेको छ। डिएसपी मुकारुङले प्रतिकार गर्न थालेपछि महिलालाई यातना दिने र कुटपिट गर्ने कामसमेत भएको बताए।

प्रहरीले अर्जुनको होटलमा काम गर्ने आरती श्रेष्ठ नाम गरेकी युवतीलाई पनि नियन्त्रणमा लिएको छ। डिएसपी मुकारुङका अनुसार सामूहिक बलात्कार भएको घटना प्रत्यक्ष देखेकी युवतीले पीडित महिलाले चिच्याएर हारगुहार गर्दा पनि प्रहरीलाई खबर नगरेको पाइएपछि उनलाई समेत पक्राउ गरिएको छ।

बलात्कार गरिएको होटलमा पुग्दा आरती र बलात्कारमा संलग्न अर्जुनका भाइ मनोजले पीडित महिलाकी बहिनीलाई दुव्र्यवहारसमेत गरेको पाइएको उनले बताए। गम्भीर ढंगले घटनाको अनुसन्धान थालेर फरार रहेका रामबहादुरको खोजी तीव्र पारिएको मुकारुङले बताए।

पीडित महिला सपरिवार खोटाङबाट गत असोजमा मोरङको बेलबारी बसाइँ सरेकी हुन्। श्रीमान २ महिनाअघि पहाड घर खोटाङ गएका थिए। दुईजना कलिला नानीहरुलाई गछियास्थित बहिनीको घरमा छाडेर काम गर्न गएकी उनलाई कामबाट फर्कने क्रममा अपहरण शैलीमा लगेर बलात्कार गरिएको प्रहरीले जनाएको छ।

प्रहरीका अनुसार सुरुमा रामबहादुरले र त्यसपछि मनोज तथा अर्जुनले पालैपालो बलात्कार गरेको पाइएको छ। शुक्रबार राति बलात्कार भए पनि पीडितलाई उपचारका लागि भर्ना गरिएपछि शनिबार दिउँसो मात्रै प्रहरीले घटना थाहा पाएको हो।

प्रहरीका अनुसार महिलालाई बेहोस बनाउने वस्तु सुँघाएर र खुवाएर लठ्याएपछि बलात्कार गरिएको हुनसक्छ। पीडितकी बहिनीले घटनाका बारेमा आफूहरुलाई शनिबार बिहान ८ बजे मात्रै थाहा भएको बताइन्।

उनले निन्, ‘घटना थाहा पाएर पुग्दा बलात्कार गरिएको कोठा र ओछ्यान रक्ताम्य थियो।’ दिदीलाई बेहोस भएर रगतको आहालमा डुबेको देखेपछि आफूले केही सोच्न नसकेको उनले बताइन्। उपचारका लागि लैजानलाई हारगुहार गर्दा आफूमाथि नै दुव्र्यवहार भएको गुनासो उनको छ।

प्रहरीलाई खबर गर्छु भनेपछि मात्रै उपचारका लागि लैजान होटल सञ्चालक तयार भएको उनले बताइन्। उनले उपचारका लागि ल्याउने क्रममा रक्तश्राव नरोकिएकाले गाडीको सिट नै सबै रक्ताम्य भएको जानकारी दिइन्।

बलात्कारमा संलग्नले घटना सार्वजनिक गरेमा मारिदिनेसम्मको धम्की दिएको गुनासो पोखिन्। बलात्कारमा संलग्नसँग पुरानो चिनजान नरहेको उनले बताइन्। बलात्कारबाट पीडित बनेकी महिलाका आफन्तले अमानवीय एवं क्रुर घटनाका दोषीमाथि कारबाही हुनुपर्ने माग राखेका छन्।