जन्मदिन मनाउन बोलाएर १६ वर्षे किशोरीलाई सामूहिक बलात्कार गर्ने ७ पक्राउ

नेपालगञ्ज – बाँके जिल्लाकी एक १६ बर्षीया किशोरीलाई जन्मदिन मनाउन भनेर बोलाई किशोरीका प्रेमी र अन्य ६ जनाले सामूहिक बलात्कार गरेको आरोपमा प्रहरीले सोमबार सात जनालाई पक्राउ गरेको छ ।

फेसबुकबाट चिनजान गरी प्रेम गर्ने हेमराज थारुसहित अन्यले ति कोशोरीलाई सामुहिक बलात्कार गरेका थिए । प्रहरीले किशोरी बलात्कारको अभियोगमा हेमराज थारु, निराजन थारु, बिक्रान्त थारु, प्रवीण थारु, राजकुमार थारु, विश्वनाथ थारु र निर्देश थारुलाई पक्राउ गरेको हो ।

सामूहिक बलात्कारमा संलग्न सात जनालाई प्रहरीले बाँकेको बैजनाथ गाउँपालिका वडा नं. ८ बाट पक्राउ गरेको हो ।
पाीडित किशोरीसँग उनकाे प्रेमी १७ वर्षका हेमराज थारुले आफ्नो जन्म दिन मनाउन भन्दै भेट्न बोलाएपछि आएकी किशोरीलाई प्रेमीसहित सात जनाले शनिबार राती सामूहिक बलात्कार गरेको जिल्ला प्रहरी कार्यालय बाँकेले जनाएको छ ।

शुरुमा किशोरीलाई मदिरा खुवाई बाँके र बर्दियाको सीमाना पर्ने मानखोलाको जंगल र त्यसपछि बैजनाथस्थित एक टहरामा लगेर बलात्कार गरेको प्रहरीले जनाएको छ । मानखोलाको जंगलमा ५ जना र टहरामा लगेर २ जनाले बलात्कार गरेका थिए । पक्राउ परेका सात जनालाई प्रहरीले खजुरास्थित धनौली प्रहरी चौकीमा राखेको छ ।

पक्राउ पर्ने सबै बाँके बैजनाथ गाउँपालिका वडा नं. ८ का हुन् । उनीहरु सबै १६ देखि २५ बर्षसम्मका छन् । जिल्ला प्रहरी कार्यालय बाँकेका प्रवक्ता नायव उपरिक्षक मुधुसुदन न्यौपानेले पीडित बालिकाको बयानका आधारमा पक्राउ परेकाहरुलाई जबर्जस्ती करणी गरेको अभियोगमा अनुसन्धान भइरहेको जनाए ।

यसरी भयो घटना

पीडित किशोरी र बैजनाथ ८ का १७ वर्षे हेमराज थारुबीचमा विगत एकवर्षदेखि सामाजिक सञ्जाल फेसबुकमार्फत चिनजान भएपछि माया प्रेम बसेको थियो ।

हेमराजले आफ्नो जन्मदिन मनाउन भनेर ती किशोरीलाई शनिबार बाँके र बर्दिया जिल्लाको सीमानामा पर्ने मानखोला जंगल क्षेत्रमा आउन आग्रह गरेका थिए ।

राप्ती सोनारीबाट सार्वजनिक बस चढेर ति किशोरी प्रेमीको जन्मदिन मनाउन भनेर पुगिन् । तर, त्यहाँ ती किशोरका अरु साथीहरु पनि थिए । मानखोला पुगेकी ती किशोरीलाई शनिबार साँझ हेमराज र उनका साथी बिक्रान्तले बर्दियाको बढैयाताल घुमाउन लगे ।

बढैयाताल घुमाएर फेरि उनीहरु मानखोलाको फूलवारी आइपुगे । त्यहाँ घरेलु मदिरासहितको जन्मदिनको पार्टी चल्यो । उनीहरुले किशोरीलाई पनि मदिरा सेवन गर्न कर गरे र किशोरी मदिरा लिइन र लठ्ठ परिन् ।

मदिराले लठ्ठिएकी किशोरीलाई त्यसपछि एकपछि अर्को गर्दै प्रेमी भनिएको हेमराज र साथीहरु विक्रान्त थारु, निराजन थारु, प्रविण थारु, राजकुमार थारुले पालैपालो बलात्कार गरे । त्यो पीडा खेप्न नसकेर किशोरी अचेत भइन् ।

अचेत किशोरीलाई मोटर साइकलमा राखेर राति नै उनीहरुले बाँके बैजनाथ ८ पिपरीस्थित बिक्रान्त थारुको कटेरोमा लगे, जहाँ उनको बंगुर फार्म छ । त्यहाँ पनि विक्रान्त र निराजले बलात्कार गरेका थिए ।

अर्धचेत अवस्थाकी ती किशोरीलाई मध्यराति नै घर लैजाने योजना बनाएर बिक्रान्तकै भे ३ प ३५२७ नम्बरको मोटरसाइकलमा किशोरीलाई राखेर एक जनाले कुदाए भने अर्कोले पछाडि समाएर बसे ।

अर्धचेत अवस्थाकी किशोरीलाई बीचमा राखेर नेपालगन्ज गुलरिया सडक खण्डमा आइतबार बिहान ४ बजेतिर त्यो मोटरसाईकल पुगेपछि उढरापुरमा प्रहरीले चेकिङको समयमा किशोरीको अवस्था देखेर रोकेको थियो ।

सोधपुछका क्रममा प्रहरीले तीनैजनालाई कार्यालयमा लगेपछि किशोरीको होस फिरेपछि उनले आँफुमाथि सामूहिक बलात्कार भएको भन्दै पीडा व्यक्त गरेकी थिइन् ।