कर्पोरेट करसम्बन्धी विषयमा विश्व नेताहरूले गरे ऐतिहासिक सहमति

काठमाडाैं – विश्वका प्रमुख २० अर्थतन्त्रका नेताहरूले ठूला व्यवसायहरूको नाफामा कम्तीमा १५ प्रतिशत कर लगाउने एउटा विश्वव्यापी सम्झौतालाई अनुमोदन गरेका छन् । बहुराष्ट्रिय कम्पनीहरूले कम कर प्रावधानहरूका फाइदा उठाउँदै आफ्ना नाफा घुमाउरो तरिकाले बढाउने गरेका भन्ने चिन्ता माझ त्यस्तो प्रावधान अनुमोदन गरिएको हो ।

रोममा भइरहेको विश्वको प्रमुख २० अर्थतन्त्रको सम्मेलनमा सहभागी नेताहरूले उक्त सम्झौतामा सहमति जनाएका हुन । सम्मेलनमा छलफल हुने विषयवस्तुमा जलवायु परिवर्तन र कोभिड पनि छन् । कोभिड महामारी सुरु भएयता विश्व नेताहरूले भौतिक उपस्थिति जनाएको यो पहिलो कार्यक्रम हो ।

तर १९ वटा राष्ट्र र युरोपेली सङ्घ सदस्य रहेको जी-ट्वेन्टी समूहको सम्मेलनमा दुई जना नेता भने सहभागी छैनन् । चीनका सी जिनपिङ र रुसका भ्लादिमिर पुटिनले सम्मेलनमा भिडियो लिङ्क मार्फत सहभागिता जनाएका छन् । अमेरिकाले प्रस्ताव गरेको कर सम्बन्धी सम्झौता आधिकारिक रूपमा आइतवार स्वीकृत गरिने गरिने र सन् २०२३बाट लागू हुने समाचार संस्था रोयटर्सले जनाएको छ ।

अमेरिकी अर्थ मन्त्री जानेट यालेनले ऐतिहासिक सम्झौता विश्व अर्थतन्त्रका लागि ‘महत्त्वपूर्ण क्षण’ रहेको र यसले ‘कर्पोरेट करको तल्लो तहसम्मको हानिकारक दौड अन्त्य गर्ने’ बताइन् । ट्विटरमा लेख्दै उनले अमेरिकाका ठूला कम्पनीहरूले बढी कर तिर्नुपर्ने भए पनि अमेरिकी व्यवसाय र श्रमिकहरूलाई कर सम्बन्धी सम्झौताबाट लाभ हुने उल्लेख गरेकी छन् ।

स्कटल्यान्डको सहर ग्लास्गोमा सोमवार सुरु हुन लागेको विश्व जलवायु परिवर्तन सम्मेलन कोप २६ सम्मेलन अघि जी-ट्वेन्टी राष्ट्रहरूको सम्मेलन सुरु भएको हो । उक्त सम्मेलनमा हुने कुराहरूले जलवायु परिवर्तनको सामना गर्नका लागि आफ्ना प्रतिबद्धतामा राष्ट्रहरूबीच चरम भिन्नता रहेको अवस्थामा कोप २६का लागि आधारहरू तय गर्न सक्ने बताइएको छ । एजेन्सी