बलात्कारपछि अत्यधिक रक्तस्रावले इनिसाको ज्यान गएकाे हाे : पोस्टमार्टम रिपोर्ट
कागजपत्र |
सुर्खेत- सुर्खेतको वीरेन्द्रनगरकी १६ वर्षीया इनिसा विकको बलात्कारपछि भएको अत्यधिक रक्तस्रावका कारण मृत्यु भएको पुष्टि भएको छ। पोस्टमार्टम रिपोर्टले उनको यौनांगमा गहिरो चोट लागेर अत्यधिक रक्तस्राव भएको र त्यसकै कारण ज्यान गएको देखाएको हो।
भेरी अस्पताल नेपालगन्जबाट आएको फरेन्सिक विशेषज्ञ टोलीले सुर्खेतमै पोस्टमार्टम गरेको थियो। टोलीले बुझाएको प्रारम्भिक प्रतिवेदनमा इनिसाको यौनांगको भित्री भाग च्यातिएको र त्यसबाट अत्यधिक रक्तस्राव भएको उल्लेख गरिएको छ।
भेरी अस्पतालका फरेन्सिक विशेषज्ञ डा. अर्विन शाक्यका अनुसार मृतक किशोरीको यौनांगको बाहिरी तथा भित्री भाग च्यातिएको देखिएको छ। साथै उनको ढाडमा घस्रिएर लागेको चोटपटक पनि फेला परेको उनले बताए।
उनका अनुसार यौनांगमा लागेको गहिरो चोटका कारण अत्यधिक रक्तस्राव भएको र सोही कारण किशोरीको मृत्यु भएको देखिएको प्रारम्भिक निष्कर्ष छ।
गुर्भाकोट नगरपालिका–६ बडाखोली स्थायी घर भई हाल वीरेन्द्रनगर–१ बस्दै आएकी इनिसा २३ फागुनमा वीरेन्द्रनगर–४ स्थित एक सामुदायिक वनमा अचेत अवस्थामा फेला परेकी थिइन्। उनलाई तत्काल प्रादेशिक अस्पताल कालागाउँ पुर्याइएको भए पनि चिकित्सकले मृत घोषणा गरेका थिए।
वीरेन्द्रनगरस्थित उषा बालबाटिका विद्यालयमा कक्षा ११ मा अध्ययनरत इनिसा सो दिन बिहान ६ बजे ट्युसन पढ्न जाने भन्दै घरबाट निस्किएकी थिइन्। सामान्यतया बिहान ९ बजेसम्म घर फर्किने उनी त्यस दिन नआएपछि परिवारले फोन गरेका थिए। तर, उनको मोबाइल बन्द थियो। त्यसपछि परिवारले खोजी सुरु गरेका थिए।
खोजीका क्रममा एक अपरिचित व्यक्तिले इनिसाकी आमालाई फोन गरेर ‘छोरी जंगलमा अचेत अवस्थामा रहेको’ जानकारी गराएका थिए। त्यसपछि परिवारका सदस्य घटनास्थल पुगेर उनलाई अस्पताल लगेका थिए।
घटनामा संलग्न भएको आरोपमा प्रहरीले चार किशोरलाई पक्राउ गरेको छ। जिल्ला प्रहरी परिसर सुर्खेतका अनुसार घटनाकै दिन १६ वर्षीय एक किशोर पक्राउ परेका थिए। त्यसको भोलिपल्ट पीडित परिवारले सामूहिक बलात्कार भएको आशंकामा अन्य तीन किशोरविरुद्ध पनि जाहेरी दिएपछि १५, १६ र १७ वर्षका तीन जनालाई पक्राउ गरिएको हो।
जिल्ला प्रहरी परिसर सुर्खेतका प्रमुख एसपी सुधीर शाहीले पक्राउ परेकाको बयान र पोस्टमार्टम रिपोर्टका आधारमा जबर्जस्ती करणी भएको पुष्टि हुने प्रारम्भिक तथ्य फेला परेको बताए।
उनका अनुसार भिसेरा परीक्षणका लागि मृतकको रगत र स्वाब संकलन गरी प्रयोगशालामा पठाइएको छ। त्यसबाट थप प्रमाण प्राप्त हुने अपेक्षा गरिएको छ।
पीडित परिवारले घटनामा अन्य व्यक्तिहरू पनि संलग्न हुन सक्ने आशंका गर्दै थप जाहेरी दिएका छन्। प्रहरीले त्यसतर्फ पनि अनुसन्धान अघि बढाएको जनाएको छ।
एसपी शाहीका अनुसार घटनासँग सम्बन्धित मोबाइललगायत विद्युतीय सामग्रीहरू फरेन्सिक ल्याबमा पठाइएको छ र त्यसको रिपोर्ट आउन बाँकी छ।
इनिसाका बुबा ४० वर्षीय इन्द्रबहादुर विक वैदेशिक रोजगारीमा थिए। छोरीको मृत्युको खबर पाएपछि उनी घर फर्किएका छन्। उनले दोषीलाई कडा कारबाही नभएसम्म छोरीको शव नबुझ्ने अडान लिएका छन्। हाल इनिसाको शव प्रादेशिक अस्पताल सुर्खेतमै राखिएको छ।
