प्रदीपको निर्देशनमा ‘महापुरुष’ बन्दै

काठमाडौँ –  निर्देशक प्रदीप भट्टराईले मदनकृष्ण श्रेष्ठ र हरिवंश आचार्य ‘मह’ जोडीलाई लिएर ‘महापुरुष’ शीर्षकमा फिल्म बनाउने घोषणा गरेका छन् । सामाजिक सञ्जालमा कलाकार र शीर्षक सार्वजनिक गर्दै भट्टराईले फिल्म बनाउने घोषणा गर्न लागेका हुन् ।

उनले फिल्मको नाम र कलाकार सहित विभिन्न पक्षको उल्लेख गरिएको पोष्टर सार्वजनिक समेत गरेका छन् । पोष्टरको साथमा लेखेका छन्, ‘हामी यहाँहरुसँग भेट्नका लागि ‘महापुरुष’ को साथ आउँदैछौ ।’

फिल्ममा मह जोडीबाहेक गौरी मल्ल र अरुण क्षेत्रीको अभिनय रहनेछ ।  फिल्मलाई षट्कोण आर्टस्ले निर्माण गर्न लागेको हो । फिल्मको कार्यकारी निर्माता रविन्द्रसिंह बानियाँ हुन् ।

महामारी अघिदेखि नै यो फिल्म फ्लोरमा जाने तयारीमा थियो तर बारम्बारको महामारीका कारण फिल्म सुटिङमा निस्कन सकेको थिएन ।अब भने फिल्म वैशाखको तेस्रो साताबाट फ्लोरमा निस्कने चर्चा छ ।