धरानमा ‘प्रोफेसनल मर्डर’: टाउको र खुट्टा जेब्रा झोलामा, शरीर झाडीमा भेटियो

काठमाडौं – सुनसरीको धरान उपमहानगरपालिका–४ अवस्थित धरान–भेडेटार सडक खण्डमा पर्ने जंगलमा छुट्टाछुट्टै झोलाभित्र मानिसको टाउको, खुट्टा र शरीर फेला परेको छ।

हत्या गरी टाउको, शरीर र खुट्टा अलग–अलग गरी फालिएको अवस्थामा भेटिएको जिल्ला प्रहरी कार्यालय सुनसरीले जनाएको छ। टाउको र खुट्टा जेब्रा झोलामा र शरीरको भाग झाडीमा भेटिएको हो।

जिल्ला प्रहरी कार्यालय सुनसरीका प्रहरी उपरीक्षक सञ्जयसिंह थापाका अनुसार धरान–भेडेटार सडक खण्डमा पर्ने जंगलमा जेब्रा झोलाभित्र अन्दाजी ४० वर्षभन्दा माथिका पुरुषको टाउको र खुट्टा फेला परेको र सडकबाट करिब १०–१२ मिटर तल अर्को जेब्रा झोलाभित्र टाउको र खुट्टा फेला परेको हो।

बुधबार दिउँसो धरान–भेडेटार जाने सडक खण्डको आपगाछी देखि ४ घुम्ती मास्तिर जेठमाने गोलाईको जंगलमा गोठाला र दाउरा खोज्न जानेले दुर्गन्ध आएको र जेब्रा झोलामा मानिसको खुट्टा बाहिर देखेपछि प्रहरीलाई खबर गरेका थिए। घटनास्थलमा प्रहरी पुगेर हेर्दा जेब्रा झोलाभित्र टाउको र खुट्टा फेलापरेको हो।

स्थानीयवासीले शंकास्पद झोला देखेपछि प्रहरीलाई खबर गरेको एसपी थापाले बताए। उनले भने, ‘त्यसपछि इलाका प्रहरी कार्यालय धरानबाट खटिएको प्रहरी टोलीले झोलाबाट टाउको र खुट्टा निकालेको हो। टाउको र खुट्टा भेटिएपछि हामीले शरीरको भाग पनि खोजी सुरु गर्‍यौं। केही पर झाडीमा शरीरको भाग पनि भेटियो।’

मानिसको हत्या गरेर शरीरलाई टुक्रा–टुक्रा पारेर अलगअलग स्थानमा छर्नुले यो ‘प्रोफेसनल मडर’ हुनसक्ने बताइएको छ। भेटिएको शरीर, टाउको र खुट्टाको अहिलेसम्म सनाखत हुन सकेको छैन।

सामान्य जिन्स पेन्ट र टिसर्ट लगाएको अवस्थामा शव फेला परेको थापाले बताए। उनले भने, ‘प्रारम्भिक अनुसन्धानका आधारमा यो हत्या कुनै ‘प्रोफेसनल’ ले गरेको हुनपर्छ। कसैको हत्या गरेपछि टुक्राटुक्रा परेर जेब्रा झोलामा पोको पारी एक किलोमिटरको फरकमा छुट्टाछुट्टै स्थानमा फ्याँक्नुको अर्थ कुनै प्रोफेसनल मर्डर हुनुपर्छ।’

प्रहरीले कोही मानिस घरबाट सम्पर्क बाहिर रहेको बारेमा सोधी खोजी सुरु गरेको छ। फरेन्सिक विज्ञसहितको टोलीले लाशजाँच मुचुल्का गरी शव उठाएको छ। शव पोस्टमार्टमका लागि पठाइएको छ।