निर्णायक भनिएको गठबन्धनको बैठक बस्दै
कागजपत्र |
काठमाडौं – अमेरिकी सहायता परियोजना मिलेनियम च्यालेन्ज कर्पोरेसन (एमसीसी)का विषयमा छलफल गर्न सत्तारुढ गठबन्धनको हिजो बिहीबार बसेकाे बैठक बिनानिष्कर्ष टुंगिएपछि आज पुन: बस्दै छ। प्रधानमन्त्रीको सरकारी निवास बालुवाटारमा बसेको बैठकले एमसीसी संसद्मा पेस गर्ने विषय टुङ्गो लगाउने अनुमान गरिएको भए पनि बिनानिष्कर्ष बैठक सकिएपछि आज फेरि बस्ने भएको हो ।
निर्णायक बैठक भनिएको सत्तागठबन्धनको बैठक अब आज बिहान ९ बजे बस्नेछ । बैठकमा प्रधानमन्त्री शेरबहादुर देउवा, नेपाली काँग्रेस नेता कृष्णप्रसाद सिटौला, महामन्त्री गगन थापा, प्रवक्ता प्रकाशशरण महत, कानुनमन्त्री दिलेन्द्रप्रसाद बडू सहभागी थिए ।
त्यस्तै माओवादी केन्द्रका अध्यक्ष पुष्पकमल दाहाल, नेता नारायणकाजी श्रेष्ठ, एकीकृत समाजवादी अध्यक्ष माधवकुमार नेपाल र सम्मानित नेता झलनाथ खनालको सहभागिता थियो । जनता समाजवादी पार्टीबाट संघीय परिषद् अध्यक्ष डा. बाबुराम भट्टराई र नेता राजेन्द्र श्रेष्ठ सहभागी भएका थिए । आजको बैठकमा सत्ता घटक राष्ट्रिय जनमोर्चालाई भने खबर नै गरिएन । हिजो गठबन्धनको बैठकमा कुनै निष्कर्ष ननिस्किएपछि प्रधानमन्त्रीसमेत रहेका नेपाली कांग्रेसका सभापति शेरबहादुर देउवा प्रमुख प्रतिपक्ष दल नेकपा एमालेका अध्यक्ष केपी शर्मा ओलीलाई भेट्न उनकै निवास बालकोट श्रीमतीसहित पुगेका थिए । बालुवाटारमा भएको गठबन्धनको बैठकबाट निरास भएका देउवा बालकोट पुगेर के विषयमा छलफल गरे भन्ने दुवै पक्षले खुलाएका छैनन् ।
