यी हुन् तीनकुने घटनामा गोली र छर्रा खाएका २० जना, कसलाई–कहाँ लागेको थियो ?

काठमाडौं– काठमाडौंको तीनकुनेमा गत चैत १५ गते भएको हिंसात्मक प्रदर्शनमा प्रहरीको गोली र छर्रा लागेर २० जना घाइते भएको प्रहरीले बताइसकेको छ । प्रहरीको गोली लागेर किर्तिपुर–४ का सविन महर्जनको मृत्यु भएको थियो । तीनकुने नजिकै गोली लागेका उनको उपचारका लागि लैजाँदै गर्दा बाटैमा मृत्यु भएको थियो ।

गोली लागेका २० जना मध्ये १८ जना पुरूष र २ जना महिला रहेको काठमाडौं उपत्यका प्रहरी कार्यालयले जनाएको छ । २० जनामध्ये ७ जनालाई गोली र बाँकी १३ जनालाई रबरको गोली तथा छर्रा लागेको प्रहरीको रिपोर्ट छ ।

घाइतेमध्ये उदयपुर घर भइ हाल ललितपुरको ग्वार्को बस्ने २२ वर्षीया रेबिका खत्री गम्भीर भएकी थिइन् । उनको दाहिने ख्टको तिघ्रामा छर्रा लागेको थियो । गोली आरपार भएकाले उनको दुईवटा नशा चुडिएकोमा सुरुमा भेन्टिलेटरमा राखेर उपचार भएको थियो । अवस्था अलि ठिक भएपछि हाल उनी सिभल अस्पतालको आइसियूमा उपचारत छिन् । उनलाई काेटेश्वरस्थित भाटभटेनी अगाडी गोली लागेको थियो । यस्तै उनका दाई २४ वर्षीय दिनेश कुमार खत्रीलाई पनि छर्रा लागेको थियो । तीनकुनेमा उनको बायाँ तिघ्रामा छर्रा लागेको प्रहरीको रिपोर्टमा उल्लेख छ ।

त्यसैगरी तीनकुने पेट्रोलपम्प ट्राफिक लाइट मुनी शन्तिनगर बस्ने ५६ वर्षीय विकास कुमार गौतमलाई रबर बुलेट लागेको थियो । उनको देब्रे खुट्टाको पिडुँलामा उक्त गोली लागेको थियो । बैतडी घर भइ हाल बानेश्वर बस्ने २४ वर्षीय आशिष बोहारालाई जडीबुटी पुलनिर गोली लागेको थियो । उनको दाहिने पुठ्ठामा गोली लागेको थियो ।

यस्तै सोलुखुम्ब घर भइ हाल चाबहिल बस्ने ३३ वर्षका बिशाल निरौलाला सिनामंगलमा गोली लागेर घाइते भएका थिए । उनको देब्रे हातमा छर्रा लागेको थियो । भने, धुम्बाराही बस्ने ४७ वर्षीय कुमार जंग रानालाई तीनकुने कार्यक्रमस्थल मञ्च पछाडीको चोकमा गोली लागेको थियो । उनको घुडा र मेरुदण्डमा रबरको गोली लागेको थियो ।

यस्तै धादिङ घर भइ बालाजु बस्ने ३० वर्षका राजकुमार कार्कीलाई जडिबुटी चोकमा गोली लागेको थियो । उनको दुवै हातमा रबरको छर्रा लागेको प्रहरी प्रतिवेदनमा उल्लेख छ । उता तीनकुने रोयल बेङक्विट अगाडी स्याङजाका २५ वर्षीय सुमन गुरुङलाई पनि छर्रा लागेको थियो । उनको देब्रे गाला र देब्रे कानमा छर्रा लागेको थियो । यी सबैलाई उपचारका लागि केएमसी अस्पताल सिनामंगलमा लगिएको थियो ।

यस्तै तीनकुनेमा अछामको साफेबगर घर भइ हाल मुलपानी बस्दै आएका १९ वर्षीय राजेन्द्र रावललाई दाहिने खुुट्टाको पैतालामा गोली लागेको थियो । जडिबुटीमा काभ्रेको पनौती घर भइ हाल जडिबुटीमा बस्दै आएका २६ वर्षीय रामहरी श्रेष्ठलाई दाहिने हातको पाखुरामा गोली लागेको थियो । भने, सोही ठाउँमा भारतको समस्तीपुर घर भइ हाल टेकु बस्दै आएका पिल्स कुमारलाई दाहिने खुट्टाको थाइ र दाहिने हातको हत्केलामाथि छर्रा लागेको थियो ।

यस्तै खोटाङ घर भइ हाल भक्तपुर पुरानो ठिमी बस्दै आएकी ४२ वर्षीय इन्द्र माया लिम्बुमाथि तीनकुनेमा गोली लागेको थियो । उनको बायाँ तिघ्रामा छर्रा लागेको थियो । तीनकुनेमै खोटाङ घर भएका १८ वर्षीय कञ्चन राईलाई पनि दाहिने घुँडामुनि गोली लागेको थियो ।

त्यसैगरी तीनकुने चोकबाट कोटेश्वर जाने बाटोमा भोजपुरको ट्याङकेमयुङ गाउँपालिका–९ का २७ वर्षीय डिल्ली प्रसाद लुईटेल पनि गोली लागेर घाइते भएका थिए । उनको पेटको दाहिने र बाँया भागमा गोली लागेको थियो । तीनकुने चोकमा भोजपुरका ३० वर्षीय सम्भु दर्जीलाई पनि गोली लागेको थियो । उनको दाहिने कुममा गोली लागेको उपत्यका प्रहरीको रिपोर्टमा उल्लेख छ ।

सोही स्थानमा किर्तिपुर बस्ने ३४ वर्षीय अम्मर थापाको हात र थाईमा छर्रा लागेको थियो । भने, भक्तपुरका ७२ वर्षीय बालकृष्ण न्यौपानेको पेटको छेउमा छर्रा लागेको थियो । र, तीनकुनेमै पर्वतको कुस्मा नगरपालिका–१ घर भइ किर्तिपुर बस्ने ३६ वर्षीय राजन सापकोटाको बाँया हातमा रबरको गोली लागेको थियो ।

प्रदर्शनमा नेपाल प्रहरीका ३ जना प्रहरी नायब उपरिक्षक (डिएसपी) र २ इन्स्पेक्टर र सहायक निरीक्षक (असई) ५ सहित ५५ सुरक्षाकर्मी घाइते भएको जनाइएको छ भने सशस्त्रतर्फ ३ इन्स्पेक्टरसहित २५ सुरक्षाकर्मी गरी जम्मा ८० जना घाइते भएका थिए ।

चैत १५ गते नवराज सुवेदी नेतृत्वको ‘राजसंस्था पुनःस्थापनाका लागि संयुक्त जनआन्दोलन समिति’को आयोजनामा काठमाडौंको तीनकुनेमा भएको प्रदर्शनका क्रममा २ जनाको ज्यान गएको थियो । प्रदर्शन हिंसात्मक हुँदा समाचार सङ्कलन गर्न गएका पत्रकार सुरेश रजक र कीर्तिपुर नगरपालिका–४ बस्ने २९ वर्षीय सविन महर्जनले ज्यान गुमाएका थिए । भने, तोडफोड, आगजनी र लुटपाटका कारण करोडौँको क्षति भएको थियो ।

घटना अनुसन्धानका क्रममा प्रहरीले हिंसाका लागि उक्साएको आरोपमा राप्रपाका वरिष्ठ उपाध्यक्ष रवीन्द्र मिश्र र महामन्त्री धवलशमशेर राणालाई समेत हिरासतमा राखेको छ । उनीहरूसहित ६६ जनाविरुद्ध बुधबार मात्र ६ दिन हिरासत म्याद थप गरिएको छ । प्रदर्शनका जनकमान्डर तोकिएका दुर्गा प्रसाईं हाल फरार छन् ।