‘प्रेम’लाई ब्ल्याकमेलमा बदल्ने युवक पक्राउ

काठमाडौं— प्रेम सम्बन्धलाई धम्की र ब्ल्याकमेलको माध्यम बनाउने एक युवक प्रहरी नियन्त्रणमा परेका छन् । सिराहा धनगढी-७, गलबजारका २७ वर्षीय राम विहारी साफीलाई साइबर ब्युरोले प्रेम सम्बन्ध टुटेपछि अन्तरङ्ग तस्बिर तथा भिडिओ सार्वजनिक गर्ने धम्की दिएको आरोपमा पक्राउ गरेको हो ।

साफीले पीडित युवतीलाई सामाजिक सञ्जालमा तस्बिर तथा भिडिओ सार्वजनिक गर्ने मात्र होइन, उनका आफन्तलाई समेत ती सामग्री पठाइदिने भन्दै मानसिक तनाव दिने प्रयास गरेको प्रहरीको अनुसन्धानमा खुलेको छ । पीडितले साइबर ब्युरोमा उजुरी दिएपछि प्रविधिगत विश्लेषणमार्फत साफीको संलग्नता पुष्टि भएको हो ।

विद्युतीय कारोबार ऐन, २०६३ अन्तर्गत मुद्दा दर्ता गरी प्रहरीले उनलाई पक्राउ गरेको छ । काठमाडौँ जिल्ला अदालतबाट चार दिनको म्याद थप गरी घटनाबारे थप अनुसन्धान भइरहेको साइबर ब्युरोले जनाएको छ ।