६ करोड २५ लाख ठग्ने सहकारीका अध्यक्ष र उपाध्यक्ष पक्राउ
कागजपत्र |
काठमाडौं – सहकारीमार्फत् ठगी गर्ने सहकारीका दुई सञ्चालक पक्राउ परेका छन् ।
नेपाल प्रहरीको केन्द्रीय अनुसन्धान ब्यूरोले सहकारीमार्फत् उठाइएको निक्षेपकर्ताहरुको बचत हिनामिना गरेको आरोपमा पुरानो बानेश्वरस्थित भरोसा नेपाल बहुउद्देश्यीय सहकारीका सञ्चालक अध्यक्ष सुरज बस्नेत र उपाध्यक्ष शिव पाण्डेलाई पक्राउ गरेको हो ।
ब्यूरोका अनुसार उनीहरुले निक्षेपकर्ताको बचत रकम हिनामिना गरी ६ करोड २५ लाख रुपैयाँ आफूखुशी चलाएको भन्ने जाहेरीका आधारमा सञ्चालकद्वयलाई पक्राउ गरिएको जनाइएको छ ।
ब्यूरोले निजहरुलाई पक्राउ गरी आवश्यक कारबाहीका लागि अगाडि बढाइएको जनाउँदै अन्य बचतकर्ताहरुले उक्त सहकारीबाट निक्षेप तथा ब्याज रकम नपाई कानुनी कारबाही गर्नुपर्नेभएमा ब्यूरोमा सम्पर्कका लागि पनि अनुरोध गरेको छ ।
पक्राउ परेका बस्नेत काठमाडौंको अनामनगरबाट पक्राउ परेका हुन् भने पाण्डे काठमाडौं महानगरपालिका वडा नं. १६ पकनाजोलबाट पक्राउ परेको प्रहरीले जनाएको छ ।
