आयल निगमको कार्यकारी निर्देशकका लागि १७ जनाको आवेदन, कस्को दाबेदारी बलियो ?

काठमाडौं – नेपाल आयल निगम लिमिटेडको रिक्त कार्यकारी निर्देशक पदका लागि १७ जनाले आवेदन दिएका छन्।

उद्योग वाणिज्य तथा आपूर्ति मन्त्रालयका अनुसार आइतबार साँझसम्म १७ जनाले आवेदन दिएका हुन्।

मन्त्रालयका अनुसार जीवनप्रकाश सिटौला, विष्णुबाबु मिश्र, हरिभक्त शाही, डा. लक्ष्मण पौडेल, लोकबहादुर खड्का, कृष्णप्रसाद यादव, तारानाथ पौडेल र चित्तरञ्जन दासले कार्यकारी निर्देशकका लागि आवेदन दिएका छन्।

त्यस्तै, रामदेव यादव, चण्डिकाप्रसाद भट्ट, उमेशप्रसाद थानी, पंकजकुमार दास, हरिवंश आचार्य, आनन्दप्रसाद चन्द, भूपेन्द्रप्रसाद अर्याल र सञ्जय कुमारले पनि आवेदन दिएका छन्।

आवेदन दिएकामध्ये चित्तरञ्जन दास निगममै कार्यरत उपनिर्देशक हुन्। उनको कार्यकारी निर्देशक पदमा सम्भावना कमजोर छ। त्यस्तै, चण्डिकाप्रसाद भट्ट हाल विशेष आर्थिक क्षेत्र (सेज)को कार्यकारी निर्देशक हुन्। उनले ०७० मा एक कार्यकाल निगमको कार्यकारी निर्देशक भएर बिताइसकेका छन्।

जानकार स्रोतका अनुसार यसपटक पुल्चोक इन्जिनियरिङ कलेजका प्राध्यापक डाक्टर लक्ष्मण पौडेल, कांग्रेस नेता उमेशप्रसाद थानी, शिक्षा क्षेत्रका उद्यमी आनन्दप्रसाद चन्दलगायतको बलियो दाबेदारी छ।

उद्योग मन्त्रालयले २५ पुसमा कार्यकारी निर्देशकका लागि विज्ञापन गरेको थियो।