फागुन १३ मा ‘लप्पन छप्पन २’ प्रदर्शन हुने
कागजपत्र |
काठमाडौं – कोरोना महामारीका कारण पटक-पटक प्रदर्शन मिति सार्नुपरेको ‘लप्पन छप्पन २’ निर्माता टिम फागुन १३ देखि प्रदर्शन गर्ने तयारीमा छ। फिल्म प्रदर्शन हुने मिति गत फागुनमा नै तय भएकाे निर्माता तथा निर्देशक मुकुन्द भट्टले बताए ।
मंगलबार आफ्नो फेसबुक अकाउन्टमार्फत आफूले फिल्म फागुन १३ मा प्रदर्शन नहुने हल्ला सुनेको, त्यसले आफूलाई केही असर नगरेको र फिल्म फागुन १३ मै आउने उनले बताएका छन्।
फिल्ममा शिव श्रेष्ठ, सौगात मल्ल, अर्पण थापा, अनुपविक्रम शाही, प्रकाश कुँवर, दीपक क्षेत्री, सरिता गिरी लगायतका कलाकारको मुख्य भूमिका रहेको छ ।
गोल्डेन हिल्स पिक्चर्स, रोयल कुँवर इन्टरटेनमेन्ट, इपी एजुकेशन अस्ट्रेलिया, उमी ग्रुप युरोप र म्याक मिडियाको संयुक्त ब्यानरमा निर्माण भएको फिल्मका प्रस्तुतकर्ता खिलेन्द्रराज तिमसिना र निर्देशक भट्ट हुन्।
यतिवेला भट्ट ‘एक्स ९ः लेवल वान’ निर्माणको तयारीमा छन्। बलिउड अभिनेता सुनील सेट्टीदेखि नेपालका अनमोल केसी, सौगात मल्ल, पुष्प खड्का लगायतका कलाकारको अभिनय रहने उक्त फिल्मलाई नेपालको सबैभन्दा ठूलो एक्सन थ्रिलर फिल्मको रुपमा प्रचार गरिएको छ।
