‘नेपाल आइडल–४’ आजदेखि प्रसारण हुँदै

काठमाडौं – गायनमा आधारित रियालिटी शो ‘नेपाल आइडल’ को चौथो संस्करण आज बिहिबारदेखि एपीवान टेलिभिजनमा प्रसारण हुँदैछ । आजदेखि यो कार्यक्रम प्रत्येक हप्ता बिहीबार तथा शुक्रबार राति ८ः३० बजेदेखि प्रसारण हुनेछ ।

नेपाल आइडलको नयाँ संस्करणलाई अघिल्ला सिजनभन्दा शसक्त रुपमा ल्याउने योजना रहेको आयोजक संस्थाले यसअघि नै बताइसकेको छ । यो रियालिटी शोमा यसपटक संगीतकार शम्भुजित बास्कोटा, गायक सुगम पोखरेल तथा गायिका सुवानी मोक्तान निर्णायकको रुपमा रहेका छन् ।

शोको होस्ट आशिफ शाहले गर्नेछन् भने उनको को–होस्टमा रेश्मा घिमिरे रहने छिन् । पहिलो सिजनदेखि तेस्रो सिजनसम्म न्ह्यू बज्राचार्य, कालीप्रसाद बास्कोटा र इन्दिरा जोशी निर्णायक रहेकोमा यो सिजनबाट नयाँ जज ल्याइएको हो । सिजन ४ को डिजिटल अडिसन गत भदौ १ देखि भदौ ३१ सम्म गरिएको थियो ।

डिजिटल अडिसनमा पास भएकाहरुमा फिजिकल अडिसनमा सहभागि भएका थिए । नेपाल आइडलको पहिलो विजेता पोखराका बुद्ध लामा भएका थिए भने दोस्रो विजेता सुदूरपश्चिमका रवि ओड भएका थिए । तेस्रो सिजनको उपाधि भने पहिलो पटक महिला प्रतिस्पर्धी सज्जा चौलगाँईले जितेकी थिइन् ।