नेपाल बैंक ८५औं वर्षमा प्रवेश, विभिन्न कार्यक्रमको आयोजना

काठमाडौं – नेपाल बैंक ८५औं वर्ष प्रवेश गरेको छ । बैंकले वार्षिक उत्सवमा विभिन्न कार्यक्रमको आयोजना गरेको छ ।वार्षिकोत्सवको अवसरमा भूगोलपार्क स्थित केन्दीय कार्यालय परिसरमा आयोजना गरेको रक्तदान कार्यक्रममा १०४ जनाले रक्तदान गरेका थिए ।

बैंकको अनुसार देशका विभिन्न भागमा आर्थिक, सांस्कृतिक, सामाजिक, वातावरणीय, सरसफाई, शैक्षिक, स्वस्थ्य, वित्तीय साक्षरता लगायत विभिन्न सामुदायिक हित संरक्षणका कार्यक्रमहरु पनि गर्दै आएको छ ।

त्यसैको निरन्तरता स्वरुप बैंकले प्रादेशिक कार्यालय, प्रदेश १ स्थित सुनसरीको इटहरी उपमहानगरपालिकामा रहेको पार्वती माध्यमिक विद्यालयलाई १० थान सिलिङ पंखा र ३ थान स्टिलको दराज प्रदान गरेको छ ।

त्यस्तै, मोरङको सुन्दर हरैचाको रणकाली मन्दिरमा आउने भक्तजनका लागि प्लास्टिकका कुर्सीको व्यवस्था गरेको बैंकले जानकारी दिएको छ । सो अवसरमा बैंकमा अनवरत रुपमा २० वर्ष भन्दा बढी सेवा गरेका विभिन्न कर्मचारीलाई सम्मान गरिएको थियो ।