BREAKING: दुई वर्षदेखि जेलमा रहेका निर्दोष दुई सैनिक कारागारमुक्त, सेनाले लग्यो गणमा

चितवन – एसएमजी चोरीको आरोपमा साढे दुई वर्षदेखि जेलजीवन बिताई रहेका दुई सैनिक छुटेका छन् । चितवनको कालीबहादुर गणबाट हराएको एसएमजी हतियार चोरी गरेको आरोपमा जेल परेका सैनिकद्वय लबकुमार गुरुङ र सरोज तामाङ सैनिक विशेष अदालतबाट निर्दोष ठहरिएपछि आज (शुक्रबार) छुटेका हुन् ।

उनीहरूलाई नेपाली सेनाको बा २ झ ३२७३ नम्बरको गाडीमा राखेर चितवन कारागारबाट बाहिर निकालिएको थियो । सेकेन्ड लेफ्टिनेन्ट रोहण अधिकारी कमाण्डको सेनाले उनीहरूलाई गणमा लगेको छ । कारागारमुक्त भएपछि सेनाले ती सैनिकद्वय गुरूङ र तामाङलाई सेनाकै गणमा लगेको हो ।

उनीहरूको रिहाइका बखत कारागारबाहिर गुरूङ र तामाङका परिवारका साथै उक्त मुद्दाबारे चासो राख्ने अन्य व्यक्तिहरूको पनि उपस्थिति रहेको थियो ।

त्यसअघि सैनिक विशेष अदालतले शुक्रबार बिहान फैसला गर्दै हतियार चोरीको आरोपमा जेल परेका दुई सैनिक निर्दोष भएको ठहर गरेपछि तत्काल रिहा गर्नका लागि चितवन कारागार प्रशासनलाई फैसलासहित पत्र पठाएको थियो ।

सैनिकद्वयलाई उच्च अदालत पाटनका न्यायाधीश लोहितचन्द्र शाहको अध्यक्षतामा गठित रक्षा सचिव बोगेन्द्रराज शर्मा पौडेल र सेनाको प्राड विवाक प्रमुख उपरथी रत्नप्रकाश थापा संलग्न इजलासले सफाई दिएको हो ।

चोरी अभियोगमा सफाई दिँदै सैनिक विशेष अदालतले सैनिकद्वय गुरुङ र तामाङलाई ३ वर्षसम्मका लागि बढुवा रोक्काको फैसला गरेको छ ।

गत असार २८ गते चितवनमा सैनिक भरत गुरुङको हत्यामा साढे दुईवर्ष अगाडि चोरिएको भनिएको हतियार प्रयोग गरी सैनिक गंगाधर ढकालले हत्या गरेको पुष्टी भएपछि गुरुङ र तामाङ निर्दोष ठहरिएका हुन् ।

हत्या अभियुक्त ढकालले सो एसएमजी आफूले दुई वर्ष अगाडि कालीबहादुर गणबाट चोरेको साविति दिँदै सोही हतियारले भरत गुरुङको हत्या गरेको स्वीकार गरेपछि थुनामा रहेका सैनिकद्वय गुरुङ र तामाङ निर्दोष ठहरिएका थिए ।

सैनिक विशेष अदालतले ढकाललाई हतियार चोरीका साथै कर्तव्य ज्यान मुद्दामा जन्मकैद हुने फैसला सुनाएको छ ।

त्यसअघि २०७६ वैशाख ६ गते सैनिक जनरल समरी अदालतले हतियार चोरीको अभियोगमा अमल्दार लबकुमारलाई १० वर्ष र जवान सरोजलाई ७ वर्ष जेलसजाय तोकेको थियो ।