ब्रेकिङ : एआईजी सरुवा कार्यान्वयन नगर्न प्रहरी प्रधान कार्यालयलाई गृहको निर्देशन

काठमाडौं– गृह मन्त्रालयले प्रहरी अतिरिक्त महानिरिक्षक (एआईजी) सरुवा कार्यान्वयन नगर्नका लागि प्रधान कार्यालयलाई बुधबार निर्देशन दिएको छ।

सरुवा भएको ५ दिन नबित्दै निवर्तमान प्रधानमन्त्री केपी शर्मा ओलीको मन्त्रिपरिषदको निर्णय  रोक्नका लागि गृह मन्त्रालयले निर्देशन दिएको हो। मंगलबार मात्रै कांग्रेस सभापति शेरबहादुर देउवाले प्रधानमन्त्रीको शपथ लिएका थिए भने गृहमन्त्रीमा बालकृष्ण खाँड नियुक्त गरिएका थिए।

स्रोतका अनुसार एआईजी सरुवा मन्त्रिपरिषदले बदर गर्ने सम्भावना छ। समय नपुग्दै एआईजी सरुवा गरिएको भन्दै विवाद आएको थियो।

यसअघि एआईजी हरिबहादुर पाललाई प्रहरीको कार्य विभागका सरुवा गरेको थियो। यस्तै निरज शाही अपराध अनुन्धान विभाग, महानगरीय प्रहरी कार्यालय रानीपोखरीमा प्रद्युम्न कार्कीलाई सरुवा गरिएको थियो।

एआईजी विश्वराज पोखरेललाई प्रहरी प्रशिक्षण प्रतिष्ठानको प्रमुख बनाइएको थियो भने मानव स्रोत शाखामा सहकुल थापालाई पदस्थापन गरिएको थियो।