सुजिता भण्डारी प्रकरणमा प्रहरीको अनुसन्धान तीब्र, कहाँ पुग्यो अनुसन्धान?

काठमाडौं – चितवनकी सुजिता भण्डारीको रहस्यमय मृत्यु प्रकरणलाई चितवन प्रहरीले अनुसन्धान कार्यलाइ तीब्र पारेको जनाएको छ।

पूर्वी चितवनको राप्ती नगरपालिका–३ की २३ वर्षीया सुजिता असार ११ गतेदेखि अपहरणमा परेकी थिइन्। ९ दिनपछि घर नजिकै रहेको ब्रम्हस्थानी सामुदायिक वनमा शव भेटिएसँगै प्रहरीले अनुसन्धान कार्यलाई तीब्र पारेको छ।

अनुसन्धानमा जुटेको प्रहरीले भण्डारीको मोबाइल फोन शव भेटिएको स्थानबाट २० मिटर पर भेटिएको जनाएको छ। मोबाइलमा सिम भने निकालिएको पाइएको छ भने मेमोरी कार्ड भने रहेको छ।

सुजिताले प्रयोग गरेका सामान भेटिएपछि अनुसन्धानमा समेत थप सहज हुने प्रहरीको बिश्वास छ। कल डिटेल रेर्कडबाट पनि प्रहरीले अनुसन्धान गरिरहेको जनाएको छ।

यता, चितवन प्रहरीका प्रहरी प्रमुख एसपी ओम प्रसाद अधिकारीले मृतक सुजिता भण्डारीको शव परीक्षण सकिएको बताए। पोस्टमार्टम गर्ने काम सकिएको र भिसेरा परीक्षणका लागि ललितपुरको खुमलटार पठाइएको जानकारी दिए।

भण्डारीको शव भेटिएपछि अहिले उक्त घटना हत्या हो वा आत्महत्या भन्ने विषयमा प्रहरी नै अन्योलमा छ ।

मृतकको शव भेटिएको स्थानमा माउन्टेन डिउको बोत्तलमा सेतो पदार्थ भेटिनु, अपहरणमा परेको व्यक्तिको फोनबाट विभिन्न समयमा निजको साइली दिदी कवितासँग दोहोरो कुराकानी हुनु र डाटा लिएर इन्टरनेटको प्रयोग हुनु जस्ता घटनाले अनुसन्धानलाई थप जटिल बनाएको प्रहरीको भनाइ छ।