मठ–मन्दिरमा आगो लगाउने अभिव्यक्ति दिने जनक परियार पक्राउ

रुकुम पश्चिमको आठबिसकोट नगरपालिका–१२ घर भएका २७ वर्षीय परियारले अनामनगरस्थित संवाद डबलीमा आयोजित कार्यक्रममा बोल्दै मठ–मन्दिरमा आगो लगाइदिने धम्कीपूर्ण अभिव्यक्ति दिएका थिए । उनले समान अधिकार नपाएको भन्दै देशभर विद्रोह गर्ने चेतावनीसमेत दिएका थिए ।

त्यस क्रममा उनले दलित समुदायलाई लामो समयदेखि ‘नारकीय जीवन जिउन बाध्य पारिएको’ र गाउँमा दलितको अवस्था अत्यन्त दयनीय रहेको टिप्पणी गरेका थिए । उनका ती अभिव्यक्तिहरू युट्युब च्यानलमार्फत समेत प्रसारित भएको प्रहरीले जनाएको छ ।

हाल टोखा नगरपालिका–८ बानियाँटारमा बस्दै आएका परियारलाई अनुसन्धानका लागि पक्राउ गरिएको जिल्ला प्रहरी परिसर काठमाडौँका एसपी पवन भट्टराईले जानकारी दिएका छन् ।