साइबर ब्युरोको नाम दुरुपयोग गर्दै ठगी गर्ने गिरोहका चार जना पक्राउ

काठमाडौं- नेपाल प्रहरीको साइबर ब्युरोको नाम दुरुपयोग गर्दै अनलाइन ठगीमा संलग्न गिरोहका चार जनालाई प्रहरीले पक्राउ गरेको छ। केन्द्रीय साइबर ब्युरोले इलाका प्रहरी कार्यालय धरानसँगको समन्वयमा आइतबार उनीहरूलाई धरानबाट नियन्त्रणमा लिएको हो।

पक्राउ पर्नेमा धनकुटा साँगुरीगढी गाउँपालिका–३ का ३० वर्षीय दीपक लिम्बु, सुनसरी धरान उपमहानगरपालिका–९ का २१ वर्षीय सौरभ भुजेल, धरान–१३ का २८ वर्षीय सजल राई र इनरुवा नगरपालिका–६ का २४ वर्षीय सृजन थापा रहेका छन्।

प्रहरीका अनुसार पक्राउ परेकाहरूलाई आइतबार राति नै काठमाडौँ ल्याइएको छ। उनीहरूविरुद्ध विद्युतीय माध्यमबाट ठगी (साइबर अपराध) सम्बन्धी कसुरमा जिल्ला अदालत काठमाडौँबाट चार दिनको म्याद थप गरी अनुसन्धान अघि बढाइएको साइबर ब्युरोका प्रवक्ता एसपी दिलीप कुमार गिरीले जानकारी दिए।

अनुसन्धानमा उनीहरूले टेलिग्राममार्फत पहिले नै ठगीमा परेका व्यक्तिहरूलाई लक्षित गरी पुनः ठगी गर्ने गरेको खुलेको छ। उनीहरूले साइबर ब्युरोका अधिकारी बनेर पीडितलाई फोन गर्ने र ‘ट्रु कलर’ एपमा समेत आफ्नो नम्बर “साइबर ब्युरो” भनेर देखिने बनाउने गरेको पाइएको छ।

गिरोहले पीडितलाई “तपाईं पनि कानुनी कारबाहीमा पर्न सक्नुहुन्छ” भन्दै डर देखाएर रकम असुल्ने गरेको प्रारम्भिक अनुसन्धानले देखाएको छ। पीडितहरूको उजुरीपछि प्राविधिक अनुसन्धानमार्फत उनीहरूलाई पक्राउ गरिएको हो।

प्रहरीले उनीहरूले पीडितको विवरण कसरी प्राप्त गरे, हालसम्म कति रकम ठगी गरे तथा अन्य आपराधिक गतिविधिमा संलग्नता भए/नभएको विषयमा विस्तृत अनुसन्धान भइरहेको जनाएको छ।