काठमाडौंमा प्रहरी बनेर ठगी गर्ने दुई जना पक्राउ
कागजपत्र |
काठमाडौं – प्रहरीले आफूलाई लागूऔषध नियन्त्रण ब्यूरोको सदस्य भन्दै ठगी गर्ने दुई जनालाई पक्राउ गरेको छ।
जिल्ला प्रहरी परिसर काठमाडौँ, प्रहरी वृत्त बौद्धबाट खटिएको टोलीले गोकर्णेश्वर नगरपालिका–६ स्थित औषधि पसलबाट उनीहरूलाई नियन्त्रणमा लिएको हो। पक्राउ परेकामध्ये एक जना आकाश (३७) जिल्ला सिन्धुपाल्चोक, नमोबुद्ध स्थायी घर भएका छन् र हाल काठमाडौँ, गोकर्णेश्वर नगरपालिका बस्दै आएका छन्। अर्को प्रकाश तामाङ (३४) जिल्ला दोलखा, मेलुङ गाउँपालिका स्थायी घर भइ काठमाडौँ महानगरपालिका–६ मा बस्दै आएका छन्।
प्रहरीका अनुसार उनीहरूले औषधि पसलमा पुगेर आफूलाई प्रहरीको रूपमा प्रस्तुत गरी अवैध औषधि तथा अन्य सामान नियन्त्रणमा लिने भनी डर देखाउँदै रकम असुली गर्ने काम गरेका थिए। पक्राउ परेका दुवैजनालाई अनुसन्धानका लागि अदालतबाट दिन ६ को म्याद थप अनुमति लिएर अनुसन्धान भइरहेको छ।
प्रहरी प्रवक्ता पवन कुमार भट्टराईले घटनाको बारेमा पुष्टि गर्दै आम नागरिकलाई सावधान रहन र अवैध क्रियाकलापमा संलग्न नहुन आग्रह गरेका छन्।
