अस्करमा गएन आमा
कागजपत्र |
काठमाडौं– एकेडेमी अफ मोशन पिक्चर आर्टस् एण्ड साइन्सेसद्वारा सन् २०२१ मा घोषणा गरिने ९३औं एकेडेमी अवार्ड (द अस्कर अवार्ड)मा अन्तर्राष्ट्रिय फिचर फिल्म विधामा प्रतिस्पर्धी बन्नका निम्ति दुई नेपाली फिल्म ‘आमा’ र ‘टेल मि हु आइ एम–सरिता उमेर ११ वर्ष’ अयोग्य भएका छन् । अस्कर छनोट समितिबाट सहभागिताका लागि आह्वान गरिएकोमा समय सीमाभित्र निम्न दीपेन्द्र के खनाल निर्देशित ‘आमा’, र सर्जियो बासो निर्देशित ‘टेल मि हु आई एम– सरिता उमेर ११ वर्ष’ मात्र दर्ता भएका थिए ।
दुबै फिल्महरुको गत बिहीबारका दिन अवलोकन हुँदा अस्करले तोकिदिएको मापदण्डहरु पूरा नभएको ठहर गरी सर्वसम्मतिद्वारा यो वर्ष नेपालबाट कुनै पनि चलचित्र सहभागिताका लागि नपठाउने निर्णय गरिएको व्यहोरा समितिको विज्ञप्तिमा उल्लेख छ ।
नेपालको समितिमा बिमल पौडेलको अध्यक्षतामा आठ सदस्यीय इन्टरनेसनल फिचर फिल्म कार्यकारी समिति रहेको छ । समितिमा लक्ष्मीनाथ शर्मा, प्रदीपकुमार उपाध्याय, राजेन्द्र शलभ, राजुविक्रम थापा, सामीप्यराज तिमल्सेना, लोकेन्द्र पराजुली ‘कपील’, चिरञ्जीवी गुरागाईं सदस्य रहेका छन् ।
