छठ हेर्न पुगेका दमकका बालकको छुरा प्रहार गरी हत्या

मोरङ – मोरङको उर्लाबारीमा १४ वर्षीय बालकको छुरा प्रहारबाट हत्या भएको छ। छठको रमझम हेर्न आइतबार राती उर्लाबारी–७ स्थित मावा खोला पुगेका झापाको दमकका दियुष श्रेष्ठको हत्या भएको हो।

उनीमाथि कसले छुरा प्रहार गर्‍यो खुलेको छैन। तर, शंकास्पद समूह पहिचान भएको प्रहरी भनाइ छ।  उनीमाथि राती साढे १० बजेतिर छुरा प्रहार भएको मोरङ प्रहरी प्रमुख एसपी शान्तिराज कोइरालाले जानकारी दिए।

छुरा प्रहारबाट घाइते भएका बालकलाई अस्पताल पुर्‍याएपछि मात्रै प्रहरीले घटनाको जानकारी पाएको थियो।  झापाको बिर्तामोडस्थित बी एन्ड सी अस्पतालमा उपचारका क्रममा सोमबार बिहान ४ः५० बजेतिर उनको मृत्यु भएको कोइरालाले जानकारी दिए।  छुरा प्रहारबाट दियुषको बायाँ कोखादेखि तलको भागमा चोट लागेको थियो।