राष्ट्रपतिबाट विभुषित मालपोत अधिकृतविरुद्ध भ्रष्टाचार मुद्दा

काठमाडौँ- मालपोत कार्यालय, ताप्लेजुङमा कार्यरत मालपोत अधिकृत लेखा पनेरु महतविरुद्ध भ्रटाचार मुद्दा दायर गरिएको छ।

अख्तियार दुरुपयोग अनुसन्धान आयोगले मालपोत अधिकृत महत उपर १ लाख ५० हजार विगो कायम गरी घुस/रिसवत लिई भ्रष्टाचार गरेको सम्बन्धी आरोप–पत्र दायर गरेको हो।

महतले जग्गा दर्ता कायम गर्ने सिलसिलामा सेवाग्राहीसँग १ लाख ५० हजार घुस माग गरेको अख्तियारले जनाएको छ। उनलाई अख्तियारको टोलीले घुस वापत सो रकम लिइसकेको अवस्थामा गत वैशाख ११ गते नियन्त्रणमा लिएको थियो।

महतविरुद्ध आज विशेष अदालत, काठमाडौंमा आरोपपत्र दायर गरिएको हो। उनी राष्ट्रपति विद्यादेबी भण्डारीबाट १ वैशाखमा निजामती सेवामा रहेर नागरिकको हित अभिवृद्धीको लागि गरेको योगदानको उच्च कदर गर्दै प्रबल जनसेवाश्री चतुर्थ श्रेणीबाट विभूषित भएकी थिइन्।