पुनःकर्जा सुविधा घटाउन आईएमएफको आग्रह

कोभिड–१९ बाट उद्यम तथा व्यवसाय बचाउन साथै पुनर्बहालीमा मद्दत गर्न राष्ट्र बैंकले सस्तो कर्जाको उपलब्धता बढाएपनि अब क्रमशः आर्थिक गतिविधि पुनर्बहाली हुने क्रम देखिएकोले अतिप्रभावित क्षेत्रमा बाहेक अन्य क्षेत्रमा सहुलियत दरको कर्जा प्रवाह गर्न अनुपयुक्त हुने बताइएको छ ।

‘पहिले आईएमएफकै सुझाव अनुसार, महामारीको समयमा सहुलियत प्याकेज ल्याइएको हो,’ राष्ट्र बैंकका एक अधिकारीले भने, ‘अहिले कडाइँ गर्न उनीहरूले आग्रह गरिरहेका छन् ।’

राष्ट्र बैंकले कोभिड–१९ को समयमा २ खर्ब १२ अर्ब रुपैयाँसम्म पुनःकर्जा दिन सकिने बताएको थियो । यद्यपि उच्चतम पुनःकर्जा परिचालन १ खर्ब ६० अर्ब रुपैयाँसम्म पुगेको थियो ।

कोभिड–१९ को समयमा दिएको सहुलियत जारी राखेर जाँदा अर्थतन्त्रमा दबाब सिर्जना भएको भन्दै अर्थतन्त्रको स्थायित्वका मुद्रा प्रदाय कम गर्न ऋणको ब्याजदर केही माथि राख्नुपर्ने आईएमएफको सुझाव छ ।