८ महिनामा १ खर्ब ४३ अर्ब ५८ करोडको धितोपत्र नेप्सेमा सूचीकृत

काठमाडौं – चालु आर्थिक वर्षको ८ महिनामा नेपाल स्टक एक्सचेन्ज लिमिटेडमा १ खर्ब ४३ अर्ब ५८ करोड बराबरको धितोपत्र सूचीकृत भएका छन् ।  नेपाल राष्ट्र बैंकले सार्वजनिक गरेको तथ्याङ्कका अनुसार फागुन मसान्तसम्ममा ४६ अर्ब १६ करोड रुपैयाँ बराबरको डिबेन्चर सूचीकृत भएको छ ।

यस्तै ३७ अर्ब १६ करोड रुपैयाँ बराबरको बोनस सेयर, २९ अर्ब ५० करोड रुपैयाँ बराबरको विकास ऋणपत्र सूचीकृत भएको छ ।  यस्तै १७ अर्ब ८३ करोड रुपैयाँ बराबरको साधारण सेयर, ९ अर्ब १८ करोड रुपैयाँ बराबरको हकप्रद सेयर र ३ अर्ब ७५ करोड रुपैयाँ बराबरको म्युचुअल फण्ड नेप्सेमा सूचीकृत भएका छन् ।

यी धितोपत्रको कुल अंकितमूल्य १ खर्ब ४३ अर्ब ५८ करोड बराबरको रहेको छ । चालु आर्थिक वर्षको ८ महिनासम्ममा सूचीकृत ६ अर्ब ६१ करोड सेयरको चुक्ता मूल्य ६ खर्ब ५१ अर्ब २१ करोड रहेको छ ।