दुर्घटनामा परेर ‘पञ्चायत २’की अभिनेत्रीसहित भोजपुरी फिल्म उद्योगका ४ कलाकारको मृत्यु

नयाँ दिल्ली- सडक दुर्घटनामा भोजपुरी फिल्म उद्योगका ४ उदीयमान स्टार कलाकारकाे मृत्यु भएकाे छ ।

मृत्यु हुनेमा चर्चित वेब सिरिज ‘पञ्चायत २’की अभिनेत्री आँचल तिवारी, भोजपुरी अभिनेत्री सिमरन श्रीवास्तव, गायक विमलेश पाण्डे र छोटु पाण्डे रहेका छन् ।

सबै कलाकारको सडक दुर्घटनामा मृत्यु भएको हो । चारै जनाको मृत्यु घटनास्थलमै भएको बताइएको छ ।

बिहारको कैमुरमा आइतबार साँझ देवकाली गाउँ नजिक जीटी रोडमा यो सडक दुर्घटना भएको थियो । सोमबार बिहान मात्रै मृतकहरूको सनाखत भएको थियो ।

आइतबार मोटरसाइकल, एसयूभी र ट्रक एक आपसमा ठोक्किएको थियो । यस घटनामा ९ जनाको मृत्यु भएको थियो ।