

रोल्पाबाट तुलसीपुर जाँदै गरेको बस दुर्घटना, ८ जना घाइते

रोल्पा – रोल्पाबाट तुलसीपुर जाँदै गरेको बस दुर्घटना हुँदा ८ जना घाइते भएका छन् । रोल्पाको रुन्टीगढीबाट दाङको तुलसीपुरतिर जाँदै गरेको बस शनिबार पानीगैरामा सडकमै पल्टिँदा ८ जना घाइते भएका हुन् । बिहान ९:५० बजे भएको दुर्घटनामा प्रहरी र गाउँलेले तत्काल घटनास्थल पुगी उद्धार गरेकाले मानवीय क्षति भने हुन पाएन ।
प्रहरीका अनुसार बस रुन्टीगढी गाउँपालिका–८ को भित्रि सडक खण्डमा पर्ने मेलटाकुरादेखि दाङ तुलसीपुर जाँदै थियो । रा १ ख ७३८ नम्बरको बस पल्टेपनि बसमा सवार रहेका १५ जनाको उद्धार गरिएको हो ।
दुर्घटना भएको आधा घण्टापछि खबर पाएपछि इलाका प्रहरी कार्यालय होलेरीबाट इन्चार्ज प्रहरी निरीक्षक मधुसुदन विश्वकर्माको नेतृत्वमा ७ जनाको प्रहरी टोलीसहित गाउँलेहरुले पल्टिएको बसभित्र रहेका यात्रुको उद्धार गरेका थिए । बसमा सवार तिहार मानेर घर फर्कने मैतालुहरु रहेको प्रहरीले जनाएको छ ।
दुर्घटनामा परी गम्भीर अवस्थाका घाइतेलाई प्रहरीको सहयोगमा थप उपचारका लागि दाङको तुलसीपुरस्थित प्रादेशिक अस्पतालमा पठाइएको छ । तर सडक अवरुद्ध हुने गरी पल्टेको बस उठाउनेबारे योजना बनाइरहेको जिल्ला प्रहरी कार्यालयका प्रवक्ता प्रहरी निरीक्षक प्रकाश भुसालले बताए । बसका चालक दाङको तुलसीपुर उपमहानगरपालिका–१९ का २८ वर्षीय केशव खड्का भने फरार रहेको प्रहरीले जनाएको छ ।
दुर्घटनामा परी दुई जना गम्भीर घाइते छन् भने अन्य ६ जना सामान्य घाइते छन् । सख्त घाइते हुनेमा दाङको तुलसीपुर उपमहानगरपालिका–१८ का ४५ वर्षीय कलिराम परियार (टाउकोमा चोट) र उनकी छोरी ४ वर्षीया अञ्जना परियार (टाउको, शरीरको विभिन्न भागमा चोट) छन् ।
यस्तै मध्यम खालका घाइते हुनेमा दाङको तुलसीपुर उपमहानगरपालिका–१९ का ४५ वर्षीय गाडी मालिक चूर्ण थापा (दाहिने हातमा चोट), रोल्पा रुन्टिगढी–८ का २९ वर्षीया गौसरा पुन (खुट्टामा चोट), उक्त गाउँकै १५ वर्षीया भावना परियार (कम्मरमा चोट), ३६ वर्षीया मनकुमारी दमाई (हात र कम्मरमा चोट), ७ वर्षीया सन्जु परियार (हातमा चोट) र ६ वर्षीया गीता पुन (आँखामा चोट) छन् ।
चाडपर्वका बेला यातायात चलाउँदा ध्यान दिएर र सुरक्षित भएर चलाउन चालकलाई निर्देशन गरिएको प्रहरी नायब उपरीक्षक विनोद घिमिरेले बताए ।

