एमालेले संसद अबरोध गरिरहे मंसिर अघि नै आमनिर्वाचन: कांग्रेस

काठमाडौं –सत्तारुढ नेपाली काँग्रेसका बरिष्ठ नेता एवम् पदाधिकारीहरुले प्रमुख प्रतिपक्षी दल नेकपा एमालेले प्रतिनिधि सभाको बैठक लगातार अबरुद्ध गरिरहे आगामी मंसिर अघि नै आमनिर्वाचन गर्नु पर्ने बताएका छन् ।

नेपाली कांग्रेसको शुभेच्छुक संस्था नेपाल निजामती कर्मचारी युनियन संघ केन्द्रीय कार्यसमितिले ले आईतबार राजधानीमा आयोजना गरेको कार्यक्रममा पार्टी वरिष्ठ नेता रामचन्द्र पौडेल, उपसभापति धनराज गुरुङ, महामन्त्री गगनकुमार थापा लगायतका नेताहरुले एमालेले संसदलाई अवरुद्ध पारिरहेमा आगामी मंसीर अघिनै संघीय संसदको निर्वाचन गर्नु पर्ने बताएका हुन् ।

बरिष्ठ नेता पौडेलले संसद सुचारु नहुने हो भने संघीय संसदको तत्कालन निर्वाचन गराउन प्रधानमन्त्री शेरबहादुर देउवालाई आफूले सुझाव दिई सकेको बताए । उनले देशलाई अलमलमा राखेर संसद चल्न नदिने हो भने नयाँ संसदका लागि चाँडै अर्को निर्वाचनको घोषणा गर्नु पर्ने बताए ।

‘मैले प्रधानमन्त्रीलाई संसद चाँडो सूचारु गर्नु प¥यो वा चाँडै संसद ल्याउन निर्वाचनमा जान पर्यो । देशलाई यस्तो अलमलमा राख्नु हुँदैन’, नेता पौडेलले भने, ‘एमसीसी पास गरिएको र यसले मुलुकको विकास र समृद्धिमा फड्को मार्नेछ । तर नेपाली जनतालाई यसबारे बुझाउन सक्नुपर्दछ ।’

कांग्रेसका उपसभापति धनराज गुरुङले कांग्रेस निर्वाचनतर्फ लम्किएको जनाउँदै एक्लै निर्वाचनमा लडने संकेत गरे । प्रचण्ड, माधव नेपालहरुलाई चमेराको संज्ञा दिँदै उनीहरुले साथ छोड्दैमा कांग्रेसलाई निर्वाचनमा केही फरक नपर्ने बताए ।

उनले भने, ‘यो चुनावी वर्ष हो । चुनावी मैदानमा काँग्रेसरुपी हात्ती लम्कदै गर्दा हात्तिको ठूलो कान देखेर चमेराहरु ओत लाग्न खोज्दैछन त्यस्ता चमेराहरुको भरोसा हुँदैन भन्ने हामीलाई राम्रैसँग थाहा छ । चमेराले हात्तिलाई सहयोग गर्न सक्दैन । दूर्गन्धित बनाउन सक्दछ, हात्तिको कानमा ।’

महामन्त्री थापाले एमालेले संसद चल्न दिएन भने मंसिर अघिनै संघीय संसदको निर्वाचन हुने र कांग्रेसले बहुमत ल्याएर पाँच वर्ष मुलुक शानदार ढंगले चलाउने बताए । उनले स्थानीय तहको निर्वाचन बैशाख ३० गते नै हुने बताए ।

‘आगामी बैशाख ३० गते स्थानीय तहको निर्वाचन गराउने हो । त्यसपछि आम चुनाव हुन्छ । एमालेले संसद चल्न दिएन भने मंसिर अघि नै चुनाव हुन सक्छ । हामी निर्वाचनमा जाने हो । शान्दार ढंगले बहुमत ल्याएर पाँच वर्ष मुलुक चलाउने हो ।’

अर्का महामन्त्री विश्वप्रकाश शर्माले रुपान्तरित काँग्रेसनै मुलुकको भरोसा भएको दावी गरे । उनले मुलुकको समृद्धिका लागि काँग्रेस एकतावद्ध हुने र मुलुकलाई विकल्प दिनेगरी अघि बढने संकल्प पनि गरे । उनले भने, ‘रुपान्तरिक भएको काँग्रेस मुलुकको भविष्य हो । यही पुरानो काँग्रेसलाई रुपान्तरित गरेर मुलुकलाई विकल्प दिने हो । किनभने काँग्रेस नै मुलुकको भरोसा हो ।’

उनले लोकतन्त्रको सवाल, मुलुकको विकास र समृद्धिको सवालमा काँग्रेस एकतावद्ध भएर अघि बढछ भन्ने कुरा संसदबाट पारित गरिएको एमसीसीले पनि देखाएको स्मरण गराए । उनले गुटको पछि लागेर पार्टीलाई कमजोर बनाउन काम गर्न नहुने पनि बताए ।