विवादपछि रोकिएको कांग्रेस सप्तरीको मतदान अझै सुरु भएन

राजविराज – पटक-पटक स्थगित हुँदै शनिबार सुरु भएको नेपाली कांग्रेस सप्तरीको नेतृत्व चयनको निर्वाचनमा फेरि विवाद भएको छ । बिहान ११ बजेदेखि सुरु भएको मतदानमा साँझ ५ बजे विवाद भएपछि मतदान प्रक्रिया रोकिएको छ ।

विवाद भएपछि तत्कालका लागि मतदान प्रक्रिया रोकिएको र दुवै पक्षबीच सहमति भए मतदान सुरु गरिने मुख्य निर्वाचन अधिकृत रुद्र शर्माले जानकारी दिए । चरवटा संसदीय निर्वाचन क्षेत्रको बुथ कायम गरिएकोमा क्षेत्र नम्बर ३ को बुथमा इच्छाएको व्यक्तिले मतदान गर्ने समबन्धी विषयमा विवा भएको हो ।

नेतृत्वका लागि उम्मेदवार रहेका संस्थापन पक्ष र संस्थापन इतर समूहबीच विवाद भई मतपत्र नै च्याताच्यात भएपछि मतदान रोकिएको छ । कुल २ हजार ५ सय ३५ मतदाता रहेकोमा साँझ ५ बजेसम्म ६ सय जनाले मात्र मतदान गर्न सकेका छन् ।

मतदान धेरैजनालाई गर्नुपर्ने हुँदा एक जनालाई कम्तीमा १० मिनेट लाग्ने गरेको छ । गाउँबाट आएका मतदाताहरु घण्टौंदेखि लाइनमा बसेका छन् । सहमतिको प्रयास भइरहे पनि रोकिएको मतदान फेरि सुरु हुन सकेको छैन ।