काँग्रेस र एमालेका दुई दर्जन नेता तथा कार्यकर्ता माओवादी केन्द्रमा प्रवेश, प्रचण्डद्वारा अबिर लगाएर स्वागत
कागजपत्र |
काठमाडौँ – नेपाली काँग्रेस र नेकपा एमालेका करिब दुई दर्जन नेता तथा कार्यकर्ता माओवादी केन्द्रमा प्रवेश गरेका छन् ।
उनीहरूलाई आज (सोमबार) माओवादी अध्यक्ष प्रचण्डले आफ्नै निवास खुमलटारमा अबिर र खादा लगाई पार्टी प्रवेश गराएका हुन् । कार्यक्रममा अध्यक्ष प्रचण्डले मधेस प्रदेशमा मधेसी जनताको पहिचान र अधिकारको लागि लड्ने पार्टी माओवादी केन्द्र नै हो भन्ने चेतना एक पटक फेरि फैलिएर गएको बताए ।
‘मधेसमा मात्र नभई देशैभर माओवादी केन्द्रमा फर्किने र प्रवेश गर्ने लहर चलेको छ, यो क्रम जारी रहन्छ’, अध्यक्ष प्रचण्डको भनाइ छ ।
माओवादी प्रवेश गर्नेहरूमा नेकपा एमाले रौतहट जिल्ला मोलापुर नगरपालिकाका वडा अध्यक्षका प्रत्याशी तथा कार्यपालिका सदस्य रामेश्वरप्रसाद साह कानूसहितका नेता तथा कार्यकर्ता छन् ।
त्यसैसरि सुदूरपश्चिमबाट नेपाली काँग्रेसमा क्रियाशील पूर्व शिक्षक जयराज भट्ट, व्यवसायी विष्णु भट्ट र पत्रकार विनोदप्रसाद भट्ट रहेको अध्यक्ष प्रचण्डको सचिवालयले जनाएको छ ।
