ट्याक्सी जलाउन खोज्ने मोक्तानसहित काठमाडौं उपत्यकाबाट ४१ बन्दकर्ता पक्राउ
कागजपत्र |
काठमाडौं – काठमाडौं उपत्यकाबाट प्रहरीले ४१ जना बन्दकर्तालाई पक्राउ गरेको छ। सात दलीय मोर्चाले आह्वान गरेको बन्दका क्रममा प्रहरीले उपत्यकाबाट ४१ जनालाई पक्राउ गरेको हो।
महानगरीय प्रहरी कार्यालय रानीपोखरीका अनुसार काठमाडौं, भक्तपुर र ललितपुरबाट ४१ जनालाई बुधबार बिहान पक्राउ गरिएको हो। पक्राउ पर्नेहरुमध्ये काठमाडौंबाट २६, ललितपुरबाट १२ र भक्तपुरबाट तीन जना रहेका छन्।
पक्राउ पर्नेमा कोटेश्वर चोकमा पेट्रोल छर्केर ट्याक्सी जलाउन खोज्ने ५० वर्षीय मंगलबहादुर मोक्तानलगायत छन्।महानगरीय प्रहरी परिसर काठमाडौंका प्रवक्ता प्रहरी उपरीक्षक (एसपी) दिनेशराज मैनालीका अनुसार बन्दका क्रममा कोटेश्वरमा ट्याक्सीमा आगो लगाउने प्रयास गरिएको थियो।
सिपी टावरनजिकै एउटा ट्याक्सीमा आगजनी गर्न खोज्ने मोक्तानसहितका बन्दकारीहरू नियन्त्रणमा लिइएको एसपी मैनालीले अनलाइनन्युज७ लाई जानकारी दिए।
त्यस्तै ललितपुरमा सार्वजनिक यातायातमा ढुंगा प्रहार गरेको, टायर बालेको आरोपमा १२ जना पक्राउ परेका छन्। भक्तपुरको कौशलटार, सल्लाघारी क्षेत्रमा टायर बालेको आरोपमा तीन जना पक्राउ परेको प्रहरीले जनाएको छ।
मोहन बैद्य नेतृत्वको नेकपा क्रान्तिकार माओवादी, विप्लव नेतृत्वको नेपाल कम्युनिष्ट पार्टी, ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी पार्टी र कर्णजित बुढाथोकी नेतृत्वकोको नेकपा माओवादी केन्द्र समाजवादी तथा सिपी गजुरेल नेतृत्वको देशभक्त गणतान्त्रीक मोर्चाले नेपाल बन्दको आह्वान गरेका हुन्।
