एमसीसीमा सत्ता साझेदारले नै षडयन्त्र गर्लान् भन्ने डर छः केन्द्रीय सदस्य बिश्वकर्मा
कागजपत्र |
काठमाडौं – नेपाली कांग्रेसका केन्द्रीय सदस्य एवं सांसद मिन बहादुर बिश्वकर्माले एमसीसी पास नभए गठबन्धन फेल हुने बताएका छन् ।
प्रधानमन्त्री शेरबहादुर देउवा निकट मानिएका सांसद विश्वकर्माले सत्तापक्षले सरकारलाई एमसीसी पास गर्न असफल पार्ने षडयन्त्र भईरहेको बताए ।
‘अहिले सत्तापक्ष र प्रतिपक्षसँग सरकारले एमसीसीका विषयमा वार्ता गरिरहेको छ, एमालेले ग्रिन सिंग्नल दिए पनि सत्तासाझेदारहरुले नै षडयन्त्र गर्लान् भन्ने डर देखिएको छ । यदी त्यसो भयो भने गठबन्धन फेल हुन्छ,’ अनलाइनन्यूज७ सँग कुरा गर्दै विश्वकर्माले भने ।
प्रधानमन्त्री देउवा एमसीसी जसरी भए पनि टेबल गर्नेपक्षमा रहेको सांसद बिश्वकर्माले बताए । ‘दलहरुबीच सहमती भएर मात्रै एमसीसीलाई संसदमा टेबल गर्ने योजना बनेको छ । सहमतीको विकल्प छैन, केहीदिनमा एमसीसी संसद्मा टेबल हुन्छ’, बिश्वकर्माले भने ।
बिश्वकर्माले एमसीसीबाट नेपाललाइ प्रतिकूल प्रभाव पर्ने कुनै पनि कारण नहेको बताउँदै जतिसक्दे छिटो पास गरेर निर्वाचनहरूमा अगाडि बढ्नुपर्ने बताए । ‘एमसीसीमा संशोधन गर्नुपर्ने केही छैन, हुँदैन पनि । एमसीसीलाई बेक्कारमा बहसको विषय बनाएका छन् । एमसीसी नेपालको हितमा नै छ । यथास्थितीमा एमसीसी पास हुन्छ,’ उनले भने ।
