बहुविवाह मुद्दामा डेढ वर्ष कैद सजाय तोकिएकी महिला पक्राउ

सुर्खेत – सुर्खेतस्थित कर्णाली प्रदेश प्रहरी कार्यालयले बहुविवाह मुद्दामा फरार एक महिलालाई पक्राउ गरेको छ । बराहताल गाउँपालिका–१० को ३० वर्षीया लक्ष्मी सारुलाई प्रदेश कार्यालयको अनुसन्धान ब्यूरोले शुक्रबार पक्राउ गरेको हो ।

विशेष सूचनाका आधारमा सारुलाई पक्राउ गरिएको कर्णाली प्रदेश प्रहरी कार्यालयका प्रवक्ता एवं प्रहरी उपरीक्षक माधवप्रसाद श्रेष्ठले जानकारी दिए । बहुविवाह मुद्दामा सुर्खेत जिल्ला अदालतको सारुलाई एक हजार जरिबानासहित एक वर्ष छ महिना कैद सजाय सुनाएको थियो ।

त्यसयता उनी फरार थिइन् । पक्राउ परेकी सारुलाई शुक्रबार नै सुर्खेत जिल्ला अदालतमा उपस्थित गराइएको प्रहरीले जनाएको छ ।