माछा व्यापारीको ध्वनि आतङ्क

दमक–झापाका माछा व्यापारीको चर्को ध्वनि प्रदूषणले जिल्लावासी हैरानी भएका छन् । गाडीमार्फत माछा बिक्रीका लागि माइकिङ गर्दै आएको बजारीकरणले जिल्लावासी हैरानी भएका हुन् ।

पछिल्ला समय माछा व्यापारीले गाडीमार्फत चौक, बजारसम्म डुलाउँदै माछा बेच्ने क्रम बढेको छ । गाडीमा माछा राखेर चर्को ध्वनि गरेर बजारीकरण गर्दा ध्वनि प्रदूषण हँुदै आएको छ । ध्वनि प्रदूषणले गर्दा चौक, बजारका बासिन्दा बढी प्रभावित हुनु परेको गुनासो छ ।

औषधि व्यवसायी सङ्घ झापा शाखाका अध्यक्ष गौतम गुप्ताले माछा व्यापारीले चर्को ध्वनि प्रदूषणले हैरानी भएको बताउछन् । सामाजिक सञ्जालमा स्टाटस लेख्दै उनले एकाबिहानैदेखि साँझसम्म व्यापारका नाममा गरिने चर्को ध्वनिले हैरानी बनाएको भन्दै त्यसलाई नियन्त्रण गर्नुपर्ने खाँचो भएको उल्लेख गरेका छन् । उनले भने, ‘माछा बेच्नका लागि गरिने यस्तो प्रचार शैली सम्बन्धित निकायले तुरुन्त रोक लगाउनुपर्छ ।’

झापाको विर्तामोड–२ को हेभन वाटर पार्क, विर्तामोडकै रारा कृषि फार्म, हरियाली माछा फार्म, चुलाचुली–१ को साम्दाङवा एग्रो लगायतका कृषि फार्मले गाडीमा बाजागाजा राखेर माछा बेचिआएका छन् । यस्ता फार्म हाउसले आफ्नै उत्पादनसँगै अन्य माछापालक किसानको माछा किनेर उपभोक्तालाई बिक्री गरिआएका छन् । गाडीमा राखेर गाउँगाउँमा डुलाउँदै माछा बेच्दा धेरै बिक्री हुने गरेका कारण पनि व्यापारीले बाजागाजा गरेर व्यापार गर्न आकर्षित भएका हुन् । तर बाजागाजाबाट निस्कने ध्वनि प्रदूषणका बारेमा भने व्यापारी रत्तिभर चासो राख्दैनन् ।

हेभन वाटर पार्कबाट उत्पादित माछा बेच्दै आएका एक गाडीका बिक्रेताले चर्को ध्वनि प्रदूषण नभएको जिकिर गर्छन् । ती बिक्रेताले गाडी एकै ठाउँमा नबस्ने भएकाले बाजागाजाले असर नपार्ने बताउँछन् ।

हेभनले पूर्वमा सम्भवतः सबैभन्दा ठूलो माछा उत्पादन गरिआएको छ । हेभनले आफ्ना उत्पादनसँगै स्थानीय किसानको माछा खरिद गरी पूर्वमै बढी माछा बिक्री गर्दै आएको छ । हेभनले माछा बिक्रीका लागि बजारमा आधा दर्जनभन्दा बढी साना तथा ठूला गाडी सञ्चालन गरिआएको छ । बजारमा हेभनका जस्तै कतिपयले त्यसैको सिको गर्र्दै धमाधम बजार खोज्न थालेपछि प्रचार शैलीमाथि सार्वजनिक रूपमा रोक लगाउन मागसमेत बढ्दै गएको सरोकारवालाहरू बताउँछन् ।

सञ्चारकर्मीसमेत रहेका उपभोक्ता हित संरक्षण मञ्च दमकका सचिव गोपाल झापाली माछा बजारमा गरिँदै आएको बाजागाजा सहितको प्रचार शैली असभ्य भएको बताउछन् । सबै माछा व्यापारीले यसरी नै बजार डुलाउँदै जाने हो भने के अवस्था होला ? उनले भने, ‘बजार खोज्ने शैलीलाई सच्याउनुपर्छ, अहिलेको जस्तो आतङ्क फैलाएर बजार प्रभावित गर्न पाइँदैन ।’

सरकारले सवारीसाधनलाई समेत हर्न बजाउन निषेध गरिआएको अवस्थामा झापामा भने माछा व्यापारीले हर्न झैँ चर्को बाजागाजा गरेर व्यापार गरिआउँदा समेत नियमकारी निकाय बेखबर छ । स्थानीय तह, प्रहरीले माछा व्यापारको यस्तो शैली देखे पनि सार्वजनिक रूपमा रोकतोक गरेका छैनन् । प्रशासनका स्थानीय एक अधिकारीले माछा व्यापारको यस्तो शैलीलाई रोक लगाउनुपर्ने आवश्यक भएको बताउँछन् ।

(रासस)